ప్రమాదవశాత్తు బావిలో పడి మహిళ మృతి

దిశ, చివ్వేంల : ప్రమాదవశాత్తు కాలు జారీ బావిలో పడి మహిళ మృతి చెందిన సంఘటన మండల పరిధిలోని ఐలాపురంలో గ్రామంలో మంగళవారం చోటుచేసుకుంది. స్థానికులు తెలిపిన వివరాల ప్రకారం..కుసునోజు లావణ్య వరి కొయ్యకాళ్లను తగలబెట్టడానికి భర్తతో కలిసి బావి దగ్గరకు వెళ్లి..మంట పెట్టింది. దీంతో చుట్టూ పొగ కమ్ముకుపోవడంతో బావిని గమనించక కాలు జారి బావిలో పడింది. కొంత దూరంలో ఉన్న భర్త కూసునోజు బాలకృష్ణ గమనించి స్థానికులని పిలువగా..వారు వచ్చి బయటికి తీశారు. కొంత సమయానికి ఆమె చనిపోయినట్టు తెలిపారు. మృతురాలికి ఇద్దరు ఆడపిల్లలు ఉండగా..32 సంవత్సరాలకే లావణ్య అకాలమరణంతో ఐలాపురంలో విషాదఛాయలు కమ్ముకున్నాయి.