చంద్రబాబు అరెస్ట్ వార్తలు వస్తే ఛానెల్ మార్చేస్తున్నా: ఎంపీ కోమటిరెడ్డి వెంకటరెడ్డి

దిశ, వెబ్‌డెస్క్: మాజీ సీఎం, టీడీపీ అధినేత చంద్రబాబు అరెస్ట్‌పై భువనగిరి ఎంపీ కోమటిరెడ్డి వెంకటరెడ్డి స్పందించారు. చంద్రబాబు అరెస్ట్ గురించి తనకు పట్టించుకునే సమయం లేదని, రానున్న తెలంగాణ ఎన్నికల్లో గెలుపు కోసం ప్రయత్నాలు చేస్తున్నట్లు తెలిపారు. వచ్చే ఎన్నికల్లో కేసీఆర్‌ను ఎలా గద్దె దించాలనే విషయంపై ఫోకస్ పెట్టానని, చంద్రబాబు అరెస్ట్ గురించి మీడియాలో వార్తలు వచ్చినా తాను చూడటం లేదని తెలిపారు. చంద్రబాబు అరెస్ట్ వార్తలు వస్తే టీవీ చానెల్ మారుస్తున్నానని, కేసీఆర్‌ను ఓడించడంపైనే తన దృష్టంతా ఉందని వెంకటరెడ్డి చెప్పారు.

ఆంధ్ర రాజకీయాల గురించి తనకు అవసరం లేదని, మాది మాకే ఉందని కోమటిరెడ్డి వెంకటరెడ్డి తెలిపారు. చంద్రబాబు అరెస్ట్‌పై ఇప్పటికే టీపీసీసీ చీఫ్ రేవంత్ రెడ్డి స్పందించిన విషయం తెలిసిందే. చంద్రబాబు అరెస్ట్‌కు నిరసనగా హైదరాబాద్‌లో ఆందోళనలు ఎందుకు చేస్తున్నారంటూ కేటీఆర్ చేసిన వ్యాఖ్యలపై రేవంత్ ఆగ్రహం వ్యక్తం చేశారు. ప్రజాస్వామ్యంలో ఆందోళనలు ఎక్కడైనా చేసుకోవచ్చని, కేటీఆర్ ఎందుకు భయపడుతున్నారని ప్రశ్నించారు.