సార్.. నాకు క్రికెట్ అంటే చాలా ఇష్టం.. క్యాన్సర్ బాధితుడి మాటలకు మంత్రి కన్నీళ్లు

దిశ, డైనమిక్ బ్యూరో: "సార్.. నాకు క్రికెట్ అంటే చాలా ఇష్టం. పెద్ద క్రికెటర్ కావాలని కలగన్నా.. నాకో క్రికెట్ కిట్ ఇప్పించండి సార్" (cancer victim) క్యాన్సర్‌తో పోరాడుతున్న ఓ యువకుడి మాటలివి. వింటే మనసున్న ప్రతీ మనిషికీ గుండె చెమర్చక మానదు. ఈ మాటలకు మంత్రి శ్రీధర్ బాబు (Minister Sridhar Babu) కన్నీళ్లు పెట్టుకున్నారు. భూపాలపల్లి జిల్లా మంథని నియోజకవర్గం లోని పలిమేల మండలం సర్వాయ్ పేట గ్రామానికి చెందిన భౌత్ నితిన్ కాన్సర్ తో బాధపడుతూ.. హైదరాబాద్‌లోని స్పర్శ హాస్పిటల్ చికిత్స పొందుతున్నారు.

ఈ విషయం తెలుసుకున్న మంత్రి శ్రీధర్ బాబు స్వయంగా ఆసుపత్రికెళ్లి పరామర్శించారు. నేనున్నానని ఆయన భరోసానిచ్చారు. ఈ సందర్భంగా నితిన్ మాటలకు కన్నీళ్లు పెట్టుకున్న శ్రీధర్ బాబు.. అప్పటికప్పుడు క్రికెట్ కిట్ తెప్పించి అతని కోరికను నెరవేర్చారు. సొంతన్నగా వెంట నిలుస్తానని, ఏ అవసరమున్నా నేరుగా నన్ను సంప్రదించండి అంటూ నితిన్ తల్లిదండ్రులకు మంత్రి శ్రీధర్ బాబు ధైర్యం చెప్పారు.