స్విగ్గీ డెలివరీ బాయ్... బైక్ చోరీల్లో ధిట్టా.. జల్సాలకు అలవాటుపడి బైక్ దొంగతనాలు

దిశ,కీసర: స్విగ్గీ డెలివరీ బాయ్ గా పనిచేస్తూ... జల్సాలకు అలవాటు పడి బైక్ చోరీలకు పాల్పడుతున్నాడు. ఈ సంఘటన కీసర పోలీస్ స్టేషన్ పరిధిలో చోటుచేసుకుంది. కీసర సీఐ వెంకటయ్య తెలిపిన వివరాల ప్రకారం... నాగారం మారుతి గార్డెన్ సమీపంలో మంగళవారం తనిఖీలు నిర్వహిస్తుండగా... అనుమాస్పదంగా తచ్చాడుతున్న వ్యక్తిని పట్టుకుని విచారించారు. స్విగ్గి డెలివరీ బాయ్ గా పనిచేస్తూ ఏర్పుల సాయి సాగర్ అలియాస్ సాగర్ జీవనం సాగించేవాడు. జల్సాలకు అలవాటుపడి బైక్ దొంగతనాలకు పాల్పడుతున్నాడు. మూడు కమిషనరేట్ పరిధిలో 6 బైక్ కేసుల్లో నిందితుడిగా ఉన్నాడు. నిందితుడిపై గతంలో ఉప్పల్‌, భువనగిరి, మేడ్చల్‌ జిల్లా పరిధిలోని పోలీస్‌స్టేషన్‌లో కేసులున్నట్లు పోలీసులు వెల్లడించారు. నిందితుడిని అదుపులోకి తీసుకొని బైకులు, సెల్‌ఫోన్‌లు స్వాధీనం చేసుకున్నారు.