ఘనంగా బీఆర్ఎస్ ఆవిర్భావ దినోత్సవ సభ.. గైర్హాజరైన మాజీ ఎమ్మెల్యే, జడ్పీ చైర్మన్

దిశ, శామీర్ పేట: బీఆర్ఎస్ ఆవిర్భావ దినోత్సవం సందర్బంగా మేడ్చల్ మల్కాజిగిరి జిల్లా తూంకుంట మున్సిపాలిటీ పరిధిలోని దేవరాయంజాల్ జెన్వీ గార్డెన్స్ లో మంగళవారం ఘనంగా నిర్వహించారు. ఈ కార్యక్రమంలో నియోజకవర్గం బీఆర్ఎస్ నాయకులు భారీ ఎత్తున పాల్గొని విజయవంతం చేశారు. మేడ్చల్ నియోజకవర్గం బీఆర్ఎస్ ప్రతినిధుల మహాసభకు జడ్పీ చైర్మన్ శరత్ చంద్రారెడ్డి, మాజీ ఎమ్మెల్యే మలిపెద్ది సుదీర్ రెడ్డి గైర్హాజరయ్యారు. వారు ఈ మహాసభకు రాకపోవడంలో బీఆర్ఎస్ నాయకుల, కార్యకర్తల మధ్య చర్చనీయాంశంగా మారింది.

తాజాగా బోడుప్పల్ లో జరిగిన బీఆర్ఎస్ ఆత్మీయ సమ్మేళనంలో సుదీర్ రెడ్డి మాట్లాడుతుండగా మంత్రి మల్లారెడ్డి మైక్ ను లాక్కోవడంతో వారి మధ్య చిన్నపాటి గొడవ జరిగిన విషయం అందరికి తెలిసిందే. ఆ అవమానాన్ని దృష్టిలో ఉంచుకొని మంగళవారం జరిగిన సభకు రాలేదని కార్యకర్తల మధ్య గుసగుసలు వినిపిస్తున్నాయి. ఇంతకి సుదీర్ రెడ్డి పార్టీలో కొనసాగుతాడా లేక పార్టీకి రాజీనామా చేసి వేరే పార్టీలో చేరే ఉద్దేశం ఏమైనా ఉందేమో అని బీఅర్ఎస్ క్యాడర్ లో చర్చలు జరుగుతున్నట్లు సమాచారం. రాజకీయ పరిణామాలు ఎప్పుడు ఎటువైపు దారి తీస్తాయో ఊహించలేం. చివరికి మలిపెద్ది సుధీర్ రెడ్డి దారి ఎటువైపో వేచి చూడాల్సిందే.