షేర్‌పల్లి‌లో అర్ధరాత్రి ముసుగు ధరించిన వ్యక్తుల హల్ చల్

దిశ చేగుంట: అర్ధరాత్రి ముసుగులు ధరించిన వ్యక్తులు సంచరిస్తున్నారని సమాచారంతో గ్రామస్తులు ఆందోళన చెందుతూ అప్రమైత్తమైన సంఘటన నార్సింగి మండల పరిధిలోని షేర్ పల్లి గ్రామంలో మంగళవారం రాత్రి జరిగింది. షేర్ పల్లి గ్రామంలోకి ముసుగులు వేసుకున్న వ్యక్తులు ప్రవేశించారన్న సమాచారంతో దొంగలుగా భావించిన గ్రామస్తులు అప్రమత్తమయ్యారు. ఒక్కసారిగా గ్రామంలోని యువకులు, పెద్దలు కర్రలు పట్టుకొని గ్రామంలో దొంగలను పట్టుకునేందుకు గస్తీ తిరిగారు.

గ్రామంలోకి దొంగలు వచ్చారని తెలిసిన మహిళలు, పిల్లలు భయాందోళనకు గురయ్యారు. గ్రామస్తులంతా ఇంటి ఆరుబయట, అరుగుల పైన కర్రలు పట్టుకొని కూర్చున్నారు. షేర్ పల్లి గ్రామంలో అర్ధరాత్రి ముసుగులు ధరించిన వ్యక్తుల విషయం తెలుసుకున్న నార్సింగ్ పోలీసులు గ్రామానికి చేరుకుని గ్రామస్తులతో కలిసి గాలింపు చర్యలు చేపట్టారు. ముసుగులు ధరించిన వ్యక్తుల కోసం గాలింపు చేపట్టినా దొరకలేదు. పోలీసులు రోజు రాత్రి సమయంలో గస్తీ కాయాలని గ్రామస్తులు పోలీసులను కోరారు. గ్రామస్తులు కూడా సహకరించి పోలీసులకు అండగా ఉండాలని పోలీసులు కోరారు.