తుది శ్వాస వరకు నేను మీ సేవలో

దిశ, సిద్దిపేట ప్రతినిధి: సంపూర్ణ ఆశీస్సులు ఇచ్చిన ప్రజలకు ధన్యవాదాలు.. నా తుది శ్వాస వరకు నేను మీ సేవలో ఉంటానని మాజీ మంత్రి, ఎమ్మెల్యే తన్నీరు హరీష్ రావు అన్నారు. సిద్దిపేట జిల్లా కేంద్రంలోని ఎమ్మెల్యే క్యాంప్ కార్యాలయంలో నియోజక వర్గ పరిధిలోని 153 మందికి కళ్యాణ లక్ష్మీ, 120 మందికి 59 జీవో పట్టాలు ఎమ్మెల్యే హరీష్ రావు లబ్దిదారులకు అందజేశారు. ఈ సందర్భంగా ఆయన మాట్లాడుతూ... సిద్దిపేట నియోజకవర్గంలో ఇప్పటి వరకు 11 వేల మందికి కళ్యాణ లక్ష్మి ద్వారా రూ. 93 కోట్ల ఆర్థిక చేయూత అందించినట్లు వెల్లడించారు. సిద్దిపేటలో కార్పొరేట్ స్థాయిలో ప్రభుత్వ ఆసుపత్రిని ఏర్పాటు చేసినట్లు తెలిపారు. ప్రభుత్వ ఆసుపత్రిని అందరు సద్వినియోగం చేసుకోవాలన్నారు. ప్రయివేట్ ఆసుపత్రికి వెళ్లి డబ్బులు వృధా చేసుకోవద్దన్నారు. ఈ కార్యక్రమంలో బీఆర్ఎస్ నాయకులు మారెడ్డి. రవీందర్ రెడ్డి, మచ్చ. వేణుగోపాల్ రెడ్డి, కొండం. సంపత్ రెడ్డి తదితరులు పాల్గొన్నారు.