Crops : తాళ్లపల్లి తండాలో పంటలు ధ్వంసం.. 30 వేల వరకు నష్టం..

దిశ, శివంపేట : రైతులు సాగు చేసుకుంటున్న పంట పొలాలను రాత్రి గుర్తు తెలియని వ్యక్తులు ధ్వంసం చేసిన సంఘటన శివంపేట మండలంలోని తాళ్లపల్లి తండాలో మంగళవారం రాత్రి చోటు చేసుకుంది. వివరాల్లోకెళితే తాళ్లపల్లి తండాకు చెందిన ధనావత్ పద్మ గన్య నాయక్ చెందిన సర్వేనెంబర్ 316 లో ఒక ఎకరా పొలంలో వంకాయ సొరకాయ, బీరకాయ, ఉలువలు, టమాట వంటి పంటలు వేసి డ్రిప్పుతో సాగు చేస్తున్నాడు.

రాత్రి గుర్తుతెలియని వ్యక్తులు పంటలను ధ్వంసం చేసినట్లు బాధితులు ధనావత్ పద్మ గన్యనాయక్ ఆవేదన వ్యక్తం చేశారు. ఈ సందర్భంగా వారు మాట్లాడుతూ ఆరుగాలం కష్టపడి పండించిన పంటలను ధ్వంసం చేయడం వల్ల తీవ్రంగా నష్టం జరిగిందని సుమారు 30 వేల రూపాయలతో సాగు చేయడం కోసం ఖర్చు చేసినట్లు తెలిపారు. శివంపేట పోలీసులకు ఫిర్యాదు చేయనున్నట్లు చెప్పారు.