బీఆర్ఎస్‌కు బిగ్ షాక్...కాంగ్రెస్‌లోకి కీలక నేత

దిశ, నర్సాపూర్: బీఆర్‌ఎస్ పార్టీకి బిగ్ షాక్ తగిలింది. ఎన్నికలు సమీపిస్తున్న వేళ నర్సాపూర్ నియోజకవర్గంలో వలసలు జోరందుకున్నాయి. శివ్వంపేట మండలం కొంతన్ పల్లి గ్రామానికి చెందిన కరుణాకర్ రెడ్డి శుక్రవారం హైదరాబాద్ నగరంలో టీపీసీసీ రాష్ట్ర అధ్యక్షుడు రేవంత్ రెడ్డి సమక్షంలో కాంగ్రెస్ పార్టీలో చేరారు. ఈ సందర్భంగా ఆయన కండువా కప్పి పార్టీలోకి ఆహ్వానించారు. చింతల కరుణాకర్ రెడ్డి బీఆర్ఎస్ ఆవిర్భావం నుంచి ఆ పార్టీలో పని చేశారు. కొంతకాలం నుంచి పార్టీ కార్యక్రమాలకు దూరంగా ఉన్న కరుణాకర్ రెడ్డి నర్సాపూర్ కాంగ్రెస్ పార్టీ అభ్యర్థి ఆవుల రాజిరెడ్డి ఆహ్వానం మేరకు కాంగ్రెస్ పార్టీలో చేరారు. ఈ కార్యక్రమంలో మాజీ జెడ్పీటీసీ చిలుముల శేష సాయి రెడ్డి, సీనియర్ నాయకులు నరేందర్ రెడ్డి, సుధీర్ రెడ్డి తదితరులు ఉన్నారు.