ఆర్టీసీ బస్సులో మహిళ ప్రసవం.. కండక్టర్​ను ఘనంగా సన్మానించిన ఆర్టీసీ ఎండీ

దిశ,గద్వాల: టీజీఎస్ ఆర్టీసీ గద్వాల్ డిపో బస్సులో గర్భిణికి పురుడు పోసి మానవత్వం చాటుకున్న సంస్థ సిబ్బందిని యాజమాన్యం అభినందించింది. హైదరాబాద్ బస్ భవన్​లో మంగళవారం సంస్థ ఎండీ వీసీ సజ్జనార్ గద్వాల ఆర్టీసీ డిపోకు చెందిన కండక్టర్ భారతీ, డ్రైవర్ అంజి, స్టాప్ నర్సు అలివేలు మంగ లను ఘనంగా సన్మానించారు. ఆర్టీసీ బస్సులు, బస్ స్టేషన్​లలో పుట్టిన పిల్లలకు జీవిత కాలపు ఉచిత బస్ పాస్​ను ఇవ్వాలని గతంలో యాజమాన్యం తీసుకున్న నిర్ణయం మేరకు గద్వాల్ ఆర్టీసీ బస్సులో జన్మించిన చిన్నారికి బర్త్ డే గిఫ్ట్ గా లైఫ్ టైం ఫ్రీ బస్ పాస్​ను మంజూరు చేస్తున్నట్లు సజ్జనార్ తెలిపారు.

సోమవారం గద్వాల మండలం కొండపల్లికి చెందిన నిండు గర్భిణీ సంధ్య గద్వాల్ నుండి వనపర్తికి హెల్త్ చెకప్ కోసం గద్వాల్ ఆర్టీసీ బస్సులో వెళ్తుండగా పురిటి నొప్పులు తీవ్రమయ్యాయి. గమనించిన మహిళా కండక్టర్ భారతి, స్టాప్ నర్సు అలివేలుమంగ, ప్రయాణికుల సహాయంతో బస్సులోనే ప్రసవం చేయగా సంధ్య పండంటి ఆడబిడ్డకు జన్మించిన సంగతి తెలిసిందే. ఇందుకుగాను ఆర్టీసీ ఎండీ వీసీ సజ్జనార్ బస్సులో గర్భిణికి పురుడు పోసి మానవత్వం చాటుకున్న సిబ్బందికి, స్టాప్ నర్సును సన్మానించారు. రాఖీ పౌర్ణమి సందర్భంగా ఆర్టీసీ ఎండీ వీసీ సజ్జనార్ కు కండక్టర్ భారతి రాఖీ కట్టారు. ఈ కార్యక్రమంలో గద్వాల ఆర్టీసీ డీఎం సీహెచ్ మురళీ కృష్ణ, తదితరులు పాల్గొన్నారు.