కులగణనలో దేశానికే తెలంగాణ రోల్​మోడల్

దిశ, ఖమ్మం రూరల్ ​: కులగణనతో దేశానికే తెలంగాణ రోల్​మోడల్​గా నిలుస్తుందని, ఎన్యుమరేటర్లు బాధ్యతాయుతంగా వివరాలు నమోదు చేయాలని రాష్ట్ర రెవెన్యూ, సమాచార, హౌసింగ్​ శాఖల మంత్రి పొంగులేటి శ్రీనివాసరెడ్డి అన్నారు. శుక్రవారం రూరల్​ మండలం వెంకటగిరి పంచాయతీ పరిధిలో గల కోటనారాయణపురం గ్రామంలో కులగణను ఆయన పరిశీలించారు. గ్రామంలోని షేక్​ ఆశా బేగంతో మంత్రి మాట్లాడారు. వారి కుటుంబ వివరాలను అడిగి తెలుసుకున్నారు. ఈ సందర్భంగా జరిగిన సభలో మంత్రి మాట్లాడుతూ గణన కొంత ఇబ్బందిగా ఉన్నా అధికారులు పూర్తిగా వివరాలు సేకరించాలని కోరారు. ఒక్కొ కుటుంబానికి 75 కాలాలతో సర్వే నిర్వహిస్తున్నట్లు తెలిపారు. ఈ సర్వే ద్వారా ఏ కుటుంబానికి ఏ అవసరం ఉందో ఆ పథకాలను వర్తింపజేస్తామని తెలిపారు.

    రాజకీయాలకతీతంగా ప్రభుత్వ పథకాలు అర్హులకు అందించేందుకు ఈ సర్వే దోహదపడుతుందన్నారు. కాంగ్రెస్​ అధినేత రాహుల్ గాంధీ ఇచ్చిన మాట ప్రకారం కులగణన రాష్ట్రంలో జరుగుతుందన్నారు. చేసిన సర్వేను ఏ రోజుకు ఆరోజు కంప్యూటర్​లో నిక్షిప్తం చేస్తామన్నారు. ప్రతి ఎన్యుమరేటర్ 170 ఇళ్ల వరకు సర్వే చేస్తారని తెలిపారు. దేశంలో ఎక్కడైనా కులగణన చేయాలంటే తెలంగాణ రాష్ట్రంని మోడల్ గా తీసుకోవాలన్నారు. అనంతరం ఎన్యుమరేటర్లకు సర్వే కిట్లను పంపిణీ చేశారు.

    అనంతరం సీఎం రేవంత్​ రెడ్డి బర్త్​డే సందర్భంగా కేక్​ కట్​ చేసి సంబురాలు జరుపుకున్నారు. ఈ కార్యక్రమంలో అడిషనల్​ కలెక్టర్​ పి. శ్రీజ, ఆర్డీఓ నరసింహరావు, మద్దులపల్లి మార్కెట్​ కమిటీ చైర్మన్​ భైరు హరినాథ్​బాబు, కాంగ్రెస్​ నాయకులు మద్ది మల్లారెడ్డి, తమ్మినేని నవీన్​, కళ్లెం వెంకటరెడ్డి, కందుకూరి వెంకటనారాయణ, ఎంపీడీఓ కుమార్​, తహసీల్దార్​ రాంప్రసాద్​, ఐబీ ఎస్​ఈ మంగళపూడి వెంకటేశ్వర్లు, ఎంపీఓ రాజారావు ఉన్నారు.