అభిప్రాయబేధాలు పక్కన పెట్టి పార్టీ కోసం పనిచేద్దాం : ఎంపీ వద్దిరాజు

దిశ, కొత్తగూడెం : కొత్తగూడెం నియోజకవర్గ బీఆర్ఎస్ అభ్యర్థి, సీనియర్ శాసనసభ్యులు వనమా వెంకటేశ్వరరావును భారీ ఓట్ల మెజారిటీతో గెలిపించేందుకు మనందరం కలిసికట్టుగా ముందుకు సాగుదామని రాజ్యసభ సభ్యులు వద్దిరాజు రవిచంద్ర పిలుపునిచ్చారు. ఎంపీ రవిచంద్ర సోమవారం ఉదయం లక్ష్మీదేవిపల్లి బీఆర్ఎస్ ముఖ్యులతో సుమారు గంటన్నరసేపు ఇష్టాగోష్టి జరిపారు.

ఈ సందర్భంగా ఆయన మాట్లాడుతూ తమ మధ్య నెలకొని ఉన్న అభిప్రాయబేధాలను పక్కనబెట్టి పార్టీ కోసం, కేసీఆర్ గురించి అంకితభావంతో పనిచేద్దామన్నారు. వారి కష్టనష్టాలలో పాలు పంచుకుంటానని, ఎల్లవేళలా అందుబాటులో ఉంటానని, తక్షణ సమస్యల పరిష్కారానికి తనవంతు కృషి చేస్తానని ఎంపీ రవిచంద్ర వారికి భరోసానిచ్చారు. ఎంపీ వద్దిరాజుతో సమావేశమైన వారిలో జేవీస్ చౌదరి, అన్వర్, లగడపాటి రమేష్, తాండ్ర కృష్ణార్జునులు, ఐకే సత్యనారాయణ, మహేష్, కొల్లి పద్మ తదితర ప్రముఖులు ఉన్నారు.