ఎమ్మెల్యే రేగాపై మాజీ ఎమ్మెల్యే ఫైర్

దిశ , మణుగూరు : పినపాక నియోజకవర్గం లో ఎన్నికల వేడి మొదలైంది. తాజా , మాజీ లు ఒకరి పై ఒకరు విమర్శలు కురిపించుకుంటున్నారు. సవాళ్లు విసురుకుంటున్నారు. నువ్వు ఎంత అంటే నువ్వు ఎంత అంటూ మీడియా ముందు ఛాలెంజ్ లు చేసుకుంటున్నారు. మొన్న స్థానిక ఎమ్మెల్యే రేగా కాంతారావు సమావేశం పెట్టి ప్రత్యేర్ధి నాయకులపై ఘాటు గా కామెంట్స్ చేశారు. నేడు మాజీ ఎమ్మెల్యే పాయం వెంకటేశ్వర్లు మీడియా సమావేశం ఏర్పాటు చేసి ఎమ్మెల్యే రేగా పై తీవ్ర విమర్శలు చేశారు.

    తన హయాం లో చేసిన అభివృద్ధి మొత్తం నీ అకౌంట్ లో వేసుకుని సోషల్ మీడియా లో ప్రచారం చేస్తున్నావని, అభివృద్ధి చేస్తానని పార్టీ మారిన నువ్వు , ఏమి అభివృద్ధి చేశావో దమ్ముంటే ప్రజలకు చెప్పాలని పాయం అన్నారు. మూడు తోకలు తగిలించుకుని ముఖ్యమంత్రి కి సన్నిహితుడవి అని చెప్పుకుని తిరిగే నువ్వు ఏమి నిధులు తెచ్చావో చెప్పాలని.. ఫామ్ హౌస్ లో 100 కోట్లకు అమ్ముడు పోతూ అడ్డంగా దొరికిన నువ్వు నన్ను విమర్శించే స్థాయి లేదని మండిపడ్డారు.. విద్యార్థి దశ నుండి తాను రాజేకీయాల్లో ఉన్నానని, నువ్వు ఎప్పుడు వచ్చావో గుర్తుపెట్టుకో అని ఫైర్ అయ్యారు. నియోజకవర్గ ప్రజలు చాలా చైతన్య వంతులని రాబోయే ఎన్నికల్లో నీకు బుద్ధి చెపుతారని .. పాయం జోలికి వస్తే ఊరుకునేది లేదని ఖబడ్దార్ రేగా అంటూ హెచ్చరికలు చేశారు. ఏది ఏమైనా ఇద్దరు కూడా సోషల్ మీడియా లో ఒకరి పై ఒకరు పోస్ట్ లు చేస్తూ ఉంటే నియోజకవర్గ ప్రజలు నవ్వుకుంటున్నారు.