పాలమూరు కేసీఆర్ గడ్డ అని మరోసారి నిరూపించారు: MLC

దిశ, వెబ్‌డెస్క్: మహబూబ్‌నగర్ స్థానిక సంస్థల ఎమ్మెల్సీ ఎన్నికల్లో బీఆర్ఎస్ అభ్యర్థి నవీన్ కుమార్ రెడ్డి విజయం సాధించిన విషయం తెలిసింది. గురువారం శాసనమండలిలోని మండలి చైర్మన్ ఛాంబర్‌లో చైర్మన్ గుత్తా సుఖేందర్ రెడ్డి నవీన్ కుమార్ రెడ్డి చేత ప్రమాణ స్వీకారం చేయించారు. ప్రమాణ స్వీకారం అనంతరం ఎమ్మెల్సీ నవీన్ రెడ్డి మీడియాతో మాట్లాడారు. నన్ను ఆశీర్వదించిన కేసీఆర్, కేటీఆర్, హరీశ్ రావు, ఉమ్మడి మహబూబ్ నగర్ ప్రజా ప్రతినిధులకు రుణ పడి ఉంటానని అన్నారు. నా గెలుపులో వారి కృషి మరవలేనిదని చెప్పారు. తన విజయం తెలంగాణ అమరవీరులకు అంకితం, జూన్ రెండో తేదీనే విజయం సాధించానని గుర్తుచేశారు. అందుకే తన విజయాన్ని అమరవీరులకు అంకితం చేస్తున్నట్లు ప్రకటించారు. మహబూబ్‌నగర్ రేవంత్ రెడ్డి అడ్డ కాదు.. కేసీఆర్ గడ్డ అని మరోసారి నిరూపించారని అన్నారు. ఈ కార్యక్రమంలో మాజీ మంత్రులు మహమూద్ అలీ, సత్యవతి రాథోడ్, శ్రీనివాస్ గౌడ్, నిరంజన్ రెడ్డి, సబితా ఇంద్రారెడ్డి, ఎమ్మెల్సీ దండేవిటల్, తదితరులు పాల్గొన్నారు.