పరిశుభ్రతతోనే ఆరోగ్యంగా ఉంటాం : కలెక్టర్ పమేలా సత్పతి

దిశ,మానకొండూర్: మరుగు దొడ్లను పరిశుభ్రంగా ఉంచుకుంటేనే, ఆరోగ్యంగా జీవిస్తామనీ, జిల్లా కలెక్టర్ పమేలా సత్పతి సూచించారు. మంగళవారం కరీంనగర్ జిల్లా మానకొండూరు మండల కేంద్రంలోని జిల్లా పరిషత్ ఉన్నత పాఠశాల (బాలురు) లో పధానోపాద్యాయులు శ్రీనివాస్ ఆధ్వర్యంలో ప్రపంచ మరుగు “దొడ్ల దినోత్సవ కార్యక్రమాన్ని నిర్వహించారు. ఈ కార్యక్రమానికి ముఖ్య అతిథిగా హాజరైన జిల్లా కలెక్టర్ పమేలా సత్పతి, అదనపు కలెక్టర్ ప్రఫుల్ దేశాయ్ లు హాజరైనారు. ఈ సందర్భంగా కలెక్టర్ మాట్లాడుతూ విద్యార్థులు మరుగుదొడ్లను వాడేలా, వారి పరిసర ప్రాంతాల్లో సైతం వాడుకునేలా విద్యార్ధులు చూడాలనీ, వాటి పరిశుభ్రతను కూడా చూడాలని, అందుకు ప్రతి ఒక్క విద్యార్థి అవగాహన కలిగి ఉండాలన్నారు.

కొందరు మరుగుదొడ్లను వాడకుండా పరిసర ప్రాంతాలను వాడుకోవడం ద్వారా అనారోగ్యాల పాలవుతున్నారని గుర్తు చేశారు. ప్రభుత్వం ఎంతో డబ్బులు ఖర్చు చేసి మరుగుదొడ్లను నిర్మిస్తుందని, వాటిని మెయిటేన్ చేయడం బాధ్యతగా పాఠశాల యాజమాన్యం విద్యార్థులు చూసుకోవాలన్నారు. సామూహిక మరుగుదొడ్ల నిర్వహణ కొంత ఇబ్బందిగా ఉంటుందనీ, వాటిని సైతం సామాజిక స్ఫూర్తితో తీసుకొని చేయాల్సిన బాధ్యత అందరి మీద ఉందన్నారు. అనంతరం ఉపాన్యాసాల్లో పాల్గొన్న విద్యార్థులకు బహుమతులను అందజేశారు. ఈ కార్యక్రమంలో ఎంపీడీఓ వరలక్ష్మి, ఎంపీఓ కిరణ్ కుమార్, ఎంఈఓ మధుసూదనాచారి, నాయబ్ తహసీల్దార్ సమ్మయ్య, స్వచ్ఛ భారత్ జిల్లా కన్వీనర్ కిషన్ స్వామి, కన్సల్టెంట్ రమేష్, ఎంఐఎస్ వేణు, ఫెసిలిలేటర్లు కళ్యాణి, రవిందర్, ఉపాధ్యాయులు, విద్యార్థులు పాల్గొన్నారు.