కొత్తపేట వద్ద లారీ, బస్సు ఢీ.. 12 మందికి గాయాలు

దిశ, వెల్గటూర్: ఎండపల్లి మండల పరిధిలోని కొత్తపేట వద్ద రాష్ట్ర రహదారిపై శుక్రవారం ఘోర రోడ్డు ప్రమాదం చోటుచేసుకుంది. ఎదురెదురుగా వస్తున్న లారీ, ప్రైవేట్ బస్సు ఢీకొన్నాయి. ఈ ప్రమాదంలో గజ్వేల్ నుంచి బస్సులో ధర్మపురికి వస్తున్న 12 మంది యాత్రికులకు తీవ్ర గాయలయ్యాయి. రాత్రి వీచిన భారీ ఈదురు గాలులకు రోడ్డుపై పడిన చెట్టు కొమ్మను తప్పించబోయి బస్సు డ్రైవర్ లారీని ఢీ కొట్టాడు. బస్సును గజ్వేల్ కు చెందినదిగా పోలీసులు గుర్తించారు. ప్రమాద సమయంలో బస్సులో దాదాపుగా 25 మంది యాత్రికులు ఉన్నారు. స్థానిక ఎస్సై నరేష్ ఘటనా స్థలానికి చేరుకొని క్షతగాత్రులను బస్సులోంచి బయటకు తీసి ఆసుపత్రికి తరలించారు. ప్రమాదంలో గాయపడిన వారిలో డ్రైవర్ తో పాటు మరో ఇద్దరి పరిస్థితి విషమంగా ఉన్నట్లు సమాచారం.