కాంగ్రెస్ అభ్యర్థులతో KCR చర్చలు: డీకే శివకుమార్ సంచలన వ్యాఖ్యలు

దిశ, డైనమిక్ బ్యూరో: కాంగ్రెస్ అభ్యర్థులను ట్రాప్ చేసేందుకు కేసీఆర్ ప్రయత్నిస్తున్నారని కర్నాటక డిప్యూటీ సీఎం డీకే శివకుమార్ సంచలన వ్యాఖ్యలు చేశారు. కేసీఆర్ స్వయంగా మా అభ్యర్థులను సంప్రదిస్తున్నారని.. ఎవరెవర్ని కేసీఆర్ సంప్రదించారో వారంతా తమకు సమాచారం ఇచ్చారని చెప్పారు. కేసీఆర్ చర్యల పట్ల తాము అప్రమత్తంగా ఉన్నామన్నారు. శనివారం బెంగళూరులో మీడియాతో మాట్లాడిన ఆయన.. తెలంగాణలో కాంగ్రెస్ పార్టీ ఘన విజయం సాధించి అధికారంలోకి రాబోతున్నదని ధీమా వ్యక్తం చేశారు. గెలిచిన కాంగ్రెస్ ఎమ్మెల్యేలను కాపాడుకోవడానికి రిసార్ట్ రాజకీయాలు చేసే అవసరం కాంగ్రెస్‌కు లేదన్నారు. గెలిచిన ఎమ్మెల్యేలను రిసార్ట్‌లకు తరలిస్తామనే వార్తలన్నీ వందంతులే అని కొట్టిపారేశారు. తమ ఎమ్మెల్యేలు పార్టీకి విధేయులని అందులో తమకు ఎలాంటి అనుమానాలు లేవన్నారు. 2014 నుంచి బీఆర్ఎస్‌ను ఓడించేందుకు కాంగ్రెస్ గట్టి ప్రయత్నాలే చేస్తోందని అయితే ఈసారి మ్యాజిక్ ఫిగర్‌ను కాంగ్రెస్ పార్టీ సునాయాసంగా దాటుతుందన్నారు. తెలంగాణ సీఎం కేసీఆర్‌కు గుడ్ బై చెప్పే టైమ్ వచ్చిందన్నారు.