CM Revanth Reddy : రేపే ముహూర్తం.. యాదాద్రి జిల్లాకు సీఎం రాక

దిశ, యాదాద్రి భువనగిరి ప్రతినిధి : తెలంగాణ ముఖ్యమంత్రి రేవంత్ రెడ్డి రేపు యాదగిరిగుట్టకు కుటుంబ సమేతంగా రానున్నారు. ఆయన పుట్టినరోజు సందర్భంగా యాదగిరిగుట్టలో కుటుంబ సభ్యులతో కలిసి ప్రత్యేక పూజలు నిర్వహిస్తారు. ఈ సందర్భంగా యాదగిరిగుట్టకు రానున్న సీఎం రేవంత్ రెడ్డికి ఘనంగా స్వాగతం పలికేందుకు ప్రజా ప్రతినిధులు, పార్టీ శ్రేణులు ఏర్పాట్లు చేసుకుంటున్నారు. సీఎం పర్యటన విజయవంతంగా సాగేందుకు అధికార యంత్రాంగం అన్ని రకాల ఏర్పాట్లు చేస్తుంది.

వైటీడీఏ అధికారులతో సమీక్ష.....

తన జన్మదినం సందర్భంగా మొదట కుటుంబ సభ్యులతో కలిసి హైదరాబాద్​ నుంచి హెలికాఫ్టర్ ద్వారా యాదగిరిగుట్టకు చేరుకుంటారు. యాదగిరిగుట్ట శ్రీ లక్ష్మీనరసింహస్వామి వారి దర్శనం చేసుకుని ప్రత్యేక పూజలు నిర్వహించనున్నారు. అనంతరం ఆలయ అభివృద్ధిలో‌ భాగంగా పెండింగ్ పనులపై వైటీడీఏ అధికారులతో సమీక్ష నిర్వహించనున్నారు. ఇంతవరకు ఆలయంలో జరిగిన అభివృద్ధి పనులు, పెండింగ్ లో ఉన్న పనులు ఏఏ స్థాయిలో ఉన్నాయో తెలుసుకొని వాటి గురించి అధికారులతో చర్చించనున్నట్లు తెలుస్తోంది.

వలిగొండ మూసీ నది వెంట పాదయాత్ర

యాదగిరిగుట్ట శ్రీ లక్ష్మీనరసింహస్వామి పర్యటన అనంతరం సీఎం రేవంత్ రెడ్డి జిల్లాలోని వలిగొండ నుంచి మూసీ నది వెంట పాదయాత్ర నిర్వహించనున్నారు. వలిగొండ మండలం సంగెం గ్రామం చేరుకుంటారు. మూసీ పరీవాహక ప్రాంత రైతులతో మూసీ నది వెంట పాదయాత్ర ద్వారా భీమలింగం, ధర్మారెడ్డి కాల్వల్ని సందర్శిస్తారు.అనంతరం మూసీ పరీవాహక ప్రాంత రైతులతో సమావేశం అవుతారు. ప్రభుత్వం మూసీ పునరుద్జీవనం ప్రాజెక్టును ప్రతిష్టాత్మకంగా తీసుకుంది. ఈ నేపథ్యంలో మూసీ నది వెంట సీఎం రేవంత్ రెడ్డి పాదయాత్ర ప్రాధాన్యత సంతరించుకుంది.

సీఎం హోదాలో రెండో సారి

రేవంత్ రెడ్డి సీఎం హోదాలో రెండవసారి యాదగిరిగుట్ట క్షేత్రానికి రానున్నారు. మొదటగా మార్చి 11న యాదగిరిగుట్ట బ్రహ్మోత్సవాలు ప్రారంభం రోజున క్షేత్రాన్ని మంత్రులతో కలిసి దర్శించారు‌. తిరిగి తన జన్మదిన సందర్భంగా ఈనెల 8వ తేదీన యాదగిరిగుట్ట క్షేత్రాన్ని సందర్శించనున్నారు. సీఎం హోదాలో ఆయన మొదటిసారి పుట్టినరోజు జరుపుకుంటున్నారు.

ఏర్పాట్లలో నిమగ్నమైన ప్రజాప్రతినిధులు, అధికారులు...

సీఎం రేవంత్ రెడ్డి పాదయాత్ర ఏర్పాట్లను సంగెం వద్ద మంత్రులు కోమటిరెడ్డి వెంకటరెడ్డి, తుమ్మల నాగేశ్వరరావు, ప్రభుత్వ విప్ అయిలయ్య, భువనగిరి ఎమ్మెల్యే కుంభం అనిల్ కుమార్ రెడ్డి, రాచకొండ సీపీ సుధీర్ బాబు, కలెక్టర్ హనుమంతరావు, రెవెన్యూ అదనపు కలెక్టర్ వీరారెడ్డి పరిశీలించారు. యాదగిరిగుట్టలోని వైటీడీఏ గెస్ట్ హౌస్ లో యాదాద్రి కలెక్టర్ హనుమంతరావు సమీక్ష సమావేశం నిర్వహించారు. ఆలయ ఈఓ భాస్కరరావు జిల్లా అధికారులతో ఆలయ పరిసరాలను కలెక్టర్, సీఎం సెక్యూరిటీ అధికారులు భద్రతాపరమైన ఏర్పాట్లను పరిశీలించారు. పాదయాత్ర వద్ద ఎలాంటి అవాంఛనీయ సంఘటనలు జరగకుండా, రైతులతో నేరుగా సీఎం రేవంత్ రెడ్డి చర్చించే విధంగా అధికారులు ఏర్పాట్లు చేస్తున్నారు‌.