కాంగ్రెస్‌కు షాక్ ఇచ్చిన చిరంజీవి.. బీజేపీ ఎంపీ అభ్యర్థి కొండను గెలిపించాలని వినతి

దిశ, వెబ్‌డెస్క్: ఈ నెల 13న తెలంగాణలోని 17 పార్లమెంటు స్థానాలకు ఎన్నికలు జరగనున్న సంగతి తెలిసిందే. ఈ క్రమంలో గతంలో కాంగ్రెస్ నుంచి కేంద్రమంత్రిగా ఉన్న మెగాస్టార్ చిరంజీవి ఆ పార్టీకి షాక్ ఇచ్చారు. 13న జరిగే ఎన్నికల పోలింగ్ లో చేవెళ్ల బీజేపీ ఎంపీ అభ్యర్థి కొండా విశ్వేశ్వర్ రెడ్డి ని గెలిపించాలని కోరారు. ఈ సందర్భంగా కొండకు మద్దతు తెలుపుతూ ఆయన సోషల్ మీడియాలో ఓ వీడియోను విడుదల చేశారు. ఆ వీడియోలో.. కొండా విశ్వేశ్వర్ రెడ్డి నాకు స్నేహితుడు. అలాగే మా కోడలు ఉపాసన ద్వారా మా కుటుంబానికి దగ్గర బంధువు. ఆయన అందరికీ అందుబాటులో నేత, మంచి నాయకుడు, మంచి వ్యక్తి, ప్రజా సేవ చేసేందుకే చేవెళ్ల నుంచి పోటీ చేస్తున్నారు. అలాగే ఆయన గతంలో చేసిన అభివృద్ధి మీకు తెలుసు.. కాబట్టి మంచి నాయకుడైన కొండాకు మీ అమూల్యమైన ఓటు వేసి గెలిపించండి అంటూ మెగాస్టార్ చిరంజీవి చెప్పుకొచ్చారు. దీంతో బీజేపీ శ్రేణుల్లో ఉత్సాహం నెలకొంది.