క్యాసినో కింగ్ చీకోటి గ్యాంగ్‌కు కఠిన శిక్షలు తప్పవా.. ‘‘థాయ్’’ చట్టాలు ఏం చెబుతున్నాయంటే..?

దిశ, తెలంగాణ క్రైం బ్యూరో: థాయ్ లాండ్ చట్టాలను గమనిస్తే గ్యాంబ్లింగ్​ కేసులో పటాయాలో అరెస్టయిన క్యాసినో కింగ్​చీకోటి ప్రవీణ్​ కుమార్అ తని సహచరులకు కఠిన శిక్షలు తప్పవనిపిస్తోంది. ప్రస్తుతం ఆ దేశ చట్టాల ప్రకారం గ్యాంబ్లింగ్ ​నిర్వహించటాన్ని తీవ్రమైన నేరంగా పరిగణిస్తారు. బౌద్దిజాన్ని అనుసరించే థాయ్ ​పౌరులు కూడా జూద కార్యకలాపాలను అత్యంత హేయమైన చర్యగా భావిస్తారు. థాయ్​ ప్రభుత్వం అధికారికంగా నిర్వహించే లాటరీలు తప్ప మరే రకంగానూ ఆ దేశంలో గ్యాంబ్లింగ్ నిర్వహించటం.. ఆడటం పూర్తిగా నిషిద్దం.

1935లోనే..

థాయ్​ప్రభుత్వం 1935లోనే దేశవ్యాప్తంగా గ్యాంబ్లింగ్‌ను నిషేధిస్తూ చట్టాన్ని తీసుకొచ్చింది. బౌద్దిజాన్ని అనుసరించే ఆ దేశ పౌరులు ప్రభుత్వ నిర్ణయాన్ని సంపూర్ణంగా స్వాగతించారు. స్వచ్ఛందంగా దీని అమలుకు సహకరిస్తూ వస్తున్నారు. నిజానికి చెప్పాలంటే బౌద్దిజం ప్రకారం గ్యాంబ్లింగ్​నిర్వహించటం.. ఆడటాన్ని తీవ్రమైన పాపంగా ఆ దేశ పౌరులు భావిస్తారు. ఈ క్రమంలోనే ఆ దేశంలో ఎక్కడా అధికారిక క్యాసినోలు కనిపించవు. చివరకు పోకర్​రూములు, ఆర్కెడ్​గేములు, క్రీడల్లో బెట్టింగులు పెట్టటం వంటివి అగుపించవు.

అయితే, విదేశాల నుంచి వచ్చే టూరిస్టుల నుంచి డబ్బు కొల్లగొట్టే లక్ష్యంతో స్థానికులు కొందరు రెస్టారెంట్ల బేస్​మెంట్లు, అండర్ ​గ్రౌండ్​ పార్కింగులు, ఫైవ్​స్టార్, సెవెన్​ స్టార్​ హోటళ్లలో పోలీసుల కళ్లుగప్పి గ్యాంబ్లింగ్ ​కార్యకలాపాలు నిర్వహిస్తున్నారు. కట్టుదిట్టమైన నిఘా వ్యవస్థను ఏర్పాటు చేసుకున్న థాయ్​పోలీసులు ఎప్పటికప్పుడు ఇలా అక్రమంగా నడుస్తున్న గ్యాంబ్లింగ్ ​డెన్‌లపై దాడులు చేసి నిందితులను అరెస్టు చేయటం చేస్తున్నారు. ఈ క్రమంలోనే విదేశాల నుంచి వచ్చే పర్యాటకులకు అక్కడి విమానాశ్రయాల వద్ద గ్యాంబ్లింగ్​ నాట్​పర్మిటెడ్​ అన్న బోర్డులు ఏర్పాటు చేయటంతో పాటు ఈ కార్యకలాపాలకు దూరంగా ఉండండి అంటూ అవగాహన కల్పిస్తున్నారు.

జీవిత శిక్ష.. భారీ జరిమానాలు..

నిషేధం అమల్లో ఉన్న నేపథ్యంలో గ్యాంబ్లింగ్​ నిర్వహిస్తూ.. ఆడుతూ పట్టుబడితే థాయ్​ చట్టాల ప్రకారం యావజ్జీవ శిక్ష పడే అవకాశం ఉంది. దాంతోపాటు భారీ మొత్తాల్లో జరిమానాలు కూడా చెల్లించాల్సి ఉంటుంది. అక్రమంగా గ్యాంబ్లింగ్​ నిర్వహిస్తున్న వారికి, ఆడుతున్న వారికి సహకరించిన పలువురు అధికారులకు సైతం ఆ దేశ న్యాయస్థానాలు కఠిన శిక్షలు విధించిన ఉదంతాలు ఎన్నో ఉన్నాయి. విదేశీ పర్యాటకులకు సైతం శిక్షలు పడ్డ సంఘటనలు ఉన్నాయి. వారి వీసాలను సస్పెండ్ ​చేశారు కూడా.

ప్రతిపాదన దశలో బిల్లు..

విదేశాల నుంచి భారీ సంఖ్యలో పర్యాటకులు పటాయాకు వస్తున్న నేపథ్యంలో ఈ ఒక్క సిటీలో గ్యాంబ్లింగ్‌ను అనుమతించే దిశలో థాయ్​ ప్రభుత్వం ప్రతిపాదనలు చేసినట్టు సమాచారం. క్యాసినోలు ప్రారంభించటం వల్ల తమ దేశ పౌరులకు పెద్ద సంఖ్యలో ఉద్యోగాలు దొరకటంతో పాటు ప్రభుత్వానికి ఆదాయం పెరుగుతుందని భావిస్తున్న ప్రభుత్వం ఈ మేరకు చట్టం తీసుకు రావాలన్న యోచనలో ఉంది. ప్రస్తుతం ఇది ప్రతిపాదనల దశలోనే ఉన్నట్టు సమాచారం.