బ్రేకింగ్: తెలంగాణ పీసీసీ నూతన కమిటీలను ప్రకటించిన AICC

దిశ, తెలంగాణ బ్యూరో: తెలంగాణ కాంగ్రెస్‌లో భారీ మార్పులు చోటు చేసుకున్నాయి. టీపీసీసీ ఉపాధ్యక్షులు, ప్రధాన కార్యదర్శులతో పాటుగా 26 జిల్లాల అధ్యక్షులను మార్చారు. అదేవిధంగా పొలిటికల్​ ఎఫైర్స్ ​కమిటీకి ఏఐసీసీ రాష్ట్ర వ్యవహారాల ఇంచార్జ్​ మాణిక్కం ఠాగూర్ ​సారథ్యం వహించనున్నారు. ఇప్పటి వరకు ఈ కమిటీకి షబ్బీర్ ​అలీ చైర్మన్‌గా వ్యవహరించిన విషయం తెలిసిందే. అదే విధంగా తెలంగాణ ప్రదేశ్​ ఎగ్జిక్యూటివ్ కమిటీని ఈసారి కొత్తగా నియమించారు. టీపీసీసీ చీఫ్​రేవంత్​రెడ్డి చైర్మన్‌గా ఉన్న ఈ కమిటీలో సీఎల్పీ నేత భట్టి, మాజీ ఎంపీలు వీహెచ్​, మధుయాష్కీ, ఎంపీ ఉత్తమ్, మాజీ మంత్రులు జానారెడ్డి, పొన్నాల లక్ష్మయ్య, గీతారెడ్డి, జీవన్​రెడ్డి, షబ్బీర్ అలీ, జగ్గారెడ్డి, అంజన్ ​కుమార్​ యాదవ్, అజహరుద్దీన్, కొండా సురేఖ, వేం నరేందర్​రెడ్డి, నాగం జనార్ధన్​రెడ్డి, ఎమ్మెల్యే శ్రీధర్ బాబు, ఏలేటి మహేశ్వర్​రెడ్డి, సంపత్​కుమార్, వంశీచంద్​రెడ్డితో పాటుగా పలువురు నేతలకు అవకాశం కల్పించారు. మొత్తం ఈ కమిటీలో 40 మంది నేతలున్నారు.

అదే విధంగా ఆయా జిల్లాల అధ్యక్షులకు మార్చారు. మొత్తం 26 జిల్లాలకు కొత్త అధ్యక్షులను ప్రకటించారు. మహబూబ్​నగర్‌కు మధుసూదన్​రెడ్డి, యాదాద్రి భువనగిరికి అనిల్​కుమార్​రెడ్డి, హన్మకొండకు నాయిని రాజేందర్​రెడ్డి, పెద్దపల్లికి రాజ్ ఠాగూర్​మక్కాన్ సింగ్, రాజన్న సిరిసిల్లకు ఆది శ్రీనివాస్, సిద్దిపేటకు నర్సారెడ్డి, కరీంనగర్‌కు కవ్వంపల్లి సత్యనారాయణను నియమించారు. ఇక హైదరాబాద్​ జిల్లాకు వలీయుల్లా సమీర్, ఖైరతాబాద్‌‌కు రోహిన్​రెడ్డి, మేడ్చల్​ మల్కాజిగిరికి శ్రీధర్ ​నియమితులయ్యారు.

జిల్లా నేతలకు టీపీసీసీలో చాన్స్..

​ఇప్పటి వరకు జిల్లా కమిటీల బాధ్యతలు నిర్వర్తించిన నేతలకు ఈసారి టీపీసీసీలో అవకాశం కల్పించారు. టీపీసీసీ ఉపాధ్యక్షులుగా 24 మంది, టీపీసీసీ ప్రధాన కార్యదర్శులగా 84 మందిని నియమించారు.

పీఏసీలో 18 మంది..

టీపీసీసీ పొలిటికల్​ ఎఫైర్స్ ​కమిటీలో ఈసారి 18 మందిని నియమించగా.. ప్రత్యేక ఆహ్వానితులుగా నలుగురు పీసీసీ వర్కింగ్​ప్రెసిడెంట్లు ఉండనున్నారు. దీంతో టీపీసీసీ వర్కింగ్​ప్రెసిడెంట్లు యధాతథంగా కంటిన్యూ అవుతున్నారు.

కోమటిరెడ్డికి ఉత్తిచేయి..

ఎంపీ కోమటిరెడ్డి వెంకట్​రెడ్డికి ఈ కమిటీల్లో ఎక్కడా స్థానం దక్కలేదు. ఇప్పటి వరకు ఆయన టీపీసీసీ స్టార్​ క్యాంపెయినర్‌గా వ్యవహరిస్తున్నారు. ఇటీవల మునుగోడు ఉప ఎన్నిక నేపథ్యంలో ఆయన వ్యవహారం పార్టీలో తీవ్ర చర్చనీయాంశమైన విషయం తెలిసిందే. ఈ నేపథ్యంలో ఏఐసీసీ ప్రకటించిన కమిటీల్లో ఆయనకు చాన్స్​ దక్కకపోవడంతో.. ఆయన పార్టీలో ఉంటారా.. లేదా అనే అనుమానాలు వ్యక్తమవుతున్నాయి.