ఆర్టీసీ కార్మికులకు లక్ష బోనస్ ఏది?

దిశ, డైనమిక్ బ్యూరో: సీఎం కేసీఆర్ ఆర్టీసీకి అన్యాయం చేశారని తెలంగాణ బీజేపీ ధ్వజమెత్తింది. ఆర్థిక ఇబ్బందుల్లో ఉన్న ఆర్టీసీని ఆదుకునేందుకు ప్రభుత్వం ముందుకు రాని పరిస్థితి ఉందని ఆరోపించింది. ఆర్టీసీ కార్మికులకు నెలనెలా జీతాలు ఇవ్వలేని దయనీయ పరిస్థితి ఉన్నా ప్రభుత్వం పట్టించుకున్న పాపాన పోవడం లేదని తెలంగాణ బీజేపీ గురువారం ట్వీట్ చేసింది. ఆర్టీసీ విషయంలో కేసీఆర్ హామీలు ఇచ్చి మరిచిపోయారని సంస్థలో 10వేల కొత్త నియామకాలు చేపడాతమని, ఏటా రూ.వెయ్యి కోట్ల సాయం అందజేస్తామని గతంలో ప్రకటించారని పేర్కొంది. నాలుగు నెలలకోసారి సమీక్ష, కార్మికులకు రూ.లక్ష బోనస్, ఉద్యోగుల పిల్లలకు ఫీజు రియంబర్స్ మెంట్, ఉద్యోగులకు డబుల్ బెడ్ రూం ఇండ్లు, తల్లిదండ్రులకు ఉచిత వైద్యం హామీలు అమలు కావడం లేదని వీటిని ప్రశ్నిస్తారని కార్మికుల ఉద్యమాన్ని అణగదొక్కారని ధ్వజమెత్తారని ట్వీట్‌లో ఆరోపించింది.