బీఆర్ఎస్ కు మరో బిగ్ షాక్.. రేపు కాంగ్రెస్ గూటికి మరో ఇద్దరు మాజీ ఎమ్మెల్యేలు?

దిశ, డైనమిక్ బ్యూరో:తెలంగాణలో చేరికల రాజకీయం ఆసక్తిని పెంచుతోంది. ఎంపీ ఎన్నికల వేళ పలువురు బీఆర్ఎస్ సిట్టింగ్ ఎంపీలు, మాజీ ఎమ్మెల్యేలు, కీలక నేతలు కాంగ్రెస్, బీజేపీ గూటికి చేరుతున్నారు. ఈ క్రమంలో బీఎస్పీతో బీఆర్ఎస్ పొత్తును వ్యతిరేకిస్తున్న సిర్పూర్ మాజీ ఎమ్మెల్యే కోనేరు కోనప్ప సంచలన నిర్ణయం తీసుకున్నారు. ఆయన కొమరంభీం జిల్లా బీఆర్ఎస్ అధ్యక్ష పదవికి బుధవారం రాజీనామా చేశారు. రేపు మంత్రి సీతక్క సమక్షంలో కాంగ్రెస్ లో చేరనున్నట్లు స్పష్టం చేశారు.

కోనప్పతో పాటు మరో మాజీ ఎమ్మెల్యే?:

కోనప్ప జాయినింగ్ రోజే మరో బీఆర్ఎస్ ఎమ్మెల్యే సైతం పార్టీ మారబోతున్నారనే ప్రచారం ప్రస్తుతం రాష్ట్ర రాజకీయాల్లో హాట్ టాపిక్ గా మారింది. భువనగిరి మాజీ ఎమ్మెల్యే పైళ్ల శేఖర్ రెడ్డి బీఆర్ఎస్ ను వీడి కాంగ్రెస్ లో చేరుతానే ప్రచారం గుప్పుమంటోంది. పైళ్లశేఖర్ రెడ్డి భువనగిరి ఎంపీ టికెట్ ఆశిస్తున్నట్లు తెలుస్తోంది. మరో వైపు వర్ధన్నపేట మాజీ ఎమ్మెల్యే ఆరూరి రమేశ్ సైతం బీఆర్ఎస్ ను వీడి బీజేపీలో చేరుతారనే ప్రచారం జరుగుతోంది. ఈ క్రమంలో ఇంకెంత మంది బీఆర్ఎస్ నేతలు ఏ పార్టీలో చేరుతారనేది సస్పెన్స్ గా మారింది.