అదిరిపోయే అధికారుల స్టెప్పులతో దశాబ్ది ఉత్సవాలు..

దిశ, భీమిని : తెలంగాణ రాష్ట్ర వ్యాప్తంగా శుక్రవారం నుంచి రాష్ట్ర దశాబ్ది ఉత్సవాలు ప్రారంభమైన విషయం తెలిసిందే. ఈ మేరకు శనివారం రెండవరోజు ఉత్సవాలను అటు అధికారులు, రైతు సంబరంగా నిర్వహించారు. మంచిర్యాల జిల్లా భీమిని, కన్నెపల్లి మండలాల రైతు వేదికల వద్ద శనివారం అధికారులు ఉదయం ఏడు గంటలకు టిఫిన్స్, మధ్యాహ్న భోజనానికి చికెన్ తో వంట వార్పులో అధికారులు బిజీగా గడిపారు. కన్నెపల్లి మండలం మెట్పల్లి గ్రామంలో గ్రామస్తులు ఎడ్లబండ్లతో, డప్పుసప్పులతో నృత్యాలు వేసుకుంటూ ఉత్సవ ర్యాలీని నిర్వహించారు.

వారితో పాటుగా అధికారులు కూడా స్టెప్పులు వేస్తూ కేరింతలు కొట్టారు. ఎడ్లబండ్ల పై రైతు వేదికల వద్దకు ర్యాలీగా వచ్చిన అధికారులు సభాకార్యక్రమం ముందు జాతీయ గీతాలాపన చేశారు. ఈ సందర్భంగా అధికారులు తెలంగాణ రాష్ట్ర ప్రభుత్వం ముఖ్యమంత్రి కేసీఆర్ చేపడుతున్న పథకాలను ప్రజలకు వినిపించారు. రైతు వేదికల వద్ద ఎలాంటి అవాంఛనీయ సంఘటనలు చోటు చేసుకోకుండా జాగ్రత్తలు తీసుకున్నారు. సభకు వచ్చే వారికి త్రాగునీటి వసతి కల్పించారు. ప్రజలు ఎండ తీవ్రతను పట్టించుకోకుండా ఇబ్బందులు పడుతూ సభకు హాజరయ్యారు. ఈ ఉత్సవ సభకు అధికారులు, ఎంపీపీ, జడ్పీటీసీ, సర్పంచులు, ఎంపీటీసీలు, పాల్గొన్నారు.