ఆరు రోజుల క్రితం అదృశ్యం..నేడు మృతదేహం లభ్యం

దిశ,భైంసా : భైంసా పట్టణ కేంద్రమైన సుద్దవాగు బైపాస్ రోడ్డు మార్గంలో మంగళవారం ఉదయం మండలంలోని కుంబి గ్రామానికి చెందిన వ్యక్తి మృతదేహాం లభ్యమైంది. స్థానిక ఎన్ఆర్ గార్డెన్ సమీపంలో కుంబి గ్రామానికి చెందిన గోరేకర్ శ్యాంరావు (40) మృతదేహాం లభ్యమైంది.

మృతుని కుటుంబ సభ్యులు తెలిపిన వివరాల ప్రకారం.. గత ఆరు రోజుల నుంచి గోరేకర్ శ్యాంరావు కనిపించకుండా పోయినట్లు తెలిపారు. సంబంధిత విషయంలో కుటుంబీకులు పట్టణ పోలీస్ స్టేషన్ లో సైతం ఫిర్యాదు చేయగా సోమవారం మిస్సింగ్ కేసు నమోదైంది. మంగళవారం ఉదయం ఎన్ఆర్ గార్డెన్ వెనుక వైపు గల సుద్దవాగు పరివాహాక ప్రాంతంలో గుర్తు తెలియని మృతదేహాం లభ్యమైంది. తదుపరి పట్టణ పోలీసులు ఘటన స్థలికి వెళ్లి పరిశీలించగా.. సంబంధిత మృతదేహాం కనిపించకుండాపోయిన శ్యాంరావుగా నిర్ధారించబడింది. మృతదేహాం పక్కన పురుగుల మందు డబ్బా లభించడంతో ఆత్మహత్య చేసుకున్నట్లుగా అనుమానాలు వ్యక్తమవుతున్నాయి. భైంసా పట్టణ పోలీసులు ఘటన స్థలి చేరుకున్నారు. మృతదేహాం కుల్లిపోయి ఉండడంతో అక్కడే పోస్టుమార్టం నిర్వహించేందుకు చర్యలు చేపట్టే దిశగా ఆలోచిస్తున్నారు. మృతుడికి భార్య, కుమారుడు, కూతురు ఉన్నారు.