దిశ, మంచిర్యాల: తెలంగాణ రాష్ట్ర వ్యాప్తంగా ఉన్నత పోలీస్ స్టేషన్‌లకు అవార్డులను అందించారు. పోలీస్ స్టేషన్లలో 2021 ఏడాదిలో ఉత్తమ ప్రతిభ కనబరిచిన స్టేషన్లను ఈ ఏడాది ఉత్తమ పోలీస్ స్టేషన్ అవార్డులకు ఎంపిక చేశారు. వీటికి 2021 సంవత్సరంలో ప్రతి యూనిట్‌ నుండి అన్ని విభాగాలలో పోలీస్ స్టేషన్ల పనితీరు, కేసుల దర్యాప్తు, ఖచ్చితమైన విశ్లేషణ, నేరాల నివారణ, సమర్థవంతమైన విచారణ, ప్రోయాక్టివ్ పోలీసింగ్, 5S ఇంప్లిమెంట్, వర్టికల్ పెర్ఫార్మన్స్, కమ్యూనిటీ ఎంగేజ్‌మెంట్ మొదలైన రక్షణ క్రియాత్మక రంగాలలో వారు సాధించిన ప్రతిభ ఆధారంగా పోలీస్ స్టేషన్లను ఎంపిక చేసుకుంటారు.
అంతేకాకుండా పలు ప్రమాణాలను పరిగణనలోకి తీసుకొని నాలుగు కేటగిరీలలో విభజిస్తారు. ఇందులో భాగంగా రామగుండం పోలీస్ కమిషనరేట్ పరిధి మంచిర్యాల జోన్ నందు భీమారం పోలీస్ స్టేషన్ కేటగిరి -1(0 - 150), జైపూర్ పోలీస్ స్టేషన్ కేటగిరి -3(221 - 350), సీసీసీ నస్పూర్ పోలీస్ స్టేషన్ కేటగిరి -4( 350 పైగా) లలో ఉత్తమ పోలీస్ స్టేషన్ అవార్డును దక్కించుకున్నాయి. రాష్ట్రంలో ఉత్తమ పోలీస్ స్టేషన్‌‌లుగా ఎంపికయ్యే విధంగా పని చేసిన ఏసీపీ, సీఐ, పోలీస్ స్టేషన్ SHO అధికారులను, పోలీస్ స్టేషన్ సిబ్బంది అందరిని రామగుండం పోలీస్ కమిషనర్ ఎస్. చంద్రశేఖర్ రెడ్డి ఐపీఎస్ హృదయపూర్వక అభినందనలు తెలియజేశారు.