బెల్లంపల్లి బీజేపీ అభ్యర్థిగా శ్రీదేవి

దిశ, బెల్లంపల్లి: మంచిర్యాల జిల్లా బెల్లంపల్లి బీజేపీ అభ్యర్థిగా మాజీ ఎమ్మెల్యే శ్రీదేవి పేరు ఖరారైంది. ఈ మేరకు ఇవాళ బీజేపీ ఎమ్మెల్యే అభ్యర్థుల జాబితాలో ఆమె పేరు ప్రకటించారు. కాంగ్రెస్ పార్టీలో కొనసాగిన మాజీ ఎమ్మెల్యే శ్రీదేవి ఇటీవలే బీజేపీ పార్టీ తీర్థం పుచ్చుకున్నారు. మాజీ మంత్రి గడ్డం వినోద్ కాంగ్రెస్ పార్టీ నుంచి బరిలో ఉన్న నేపథ్యంలో తనకు పోటీ చేసే అవకాశం దక్కిందని భావించి శ్రీదేవి బీజేపీ పార్టీలో చేరారు. కాంగ్రెస్ పార్టీలో చేరిన మాజీ ఎమ్మెల్యే శ్రీదేవి పోటీ చేసే అవకాశాలు సన్నగిల్లాయి. దీంతో ఎలాగైనా ఎన్నికల రంగంలో ఎమ్మెల్యే అభ్యర్థిత్వాన్ని దక్కించుకోవాలని పట్టుదలతో ఆమె పావులు కదిపారు. రాజకీయ అనుభవం గడించిన మాజీ ఎమ్మెల్యే శ్రీదేవి సమయస్ఫూర్తితో వ్యవహరించారు. సమయానుకూలంగా రాజకీయ భౌతిక పరిస్థితులకు అనుగుణంగా నిర్ణయం తీసుకున్నారు. అందులో భాగంగానే బీజేపీ పార్టీ నుంచి పోటీ చేసే బలమైన అభ్యర్థి లేకపోవడంతో బెల్లంపల్లి బీజేపీ స్థానం మాజీ ఎమ్మెల్యే శ్రీదేవి దక్కించుకున్నారు. ఆసిఫాబాద్ జెడ్పీటీసీ గా పనిచేసిన కొయ్యల ఏమాజీ బెల్లంపల్లి అభ్యర్థిత్వాన్ని చిరకాలంగా ఆశించారు. 2018లో బీజేపీ నుంచి టిక్కెట్ తెచ్చుకొని పోటీ చేసి ఓడిపోయారు. మాజీ ఎమ్మెల్యే శ్రీదేవి బీజేపీలో చేరడంతో ఏమాజీకి గట్టి పోటీ ఎదురైంది. టికెట్ సాధనలో మాజీ ఎమ్మెల్యే శ్రీదేవి కృతకృతులయ్యారు. బీజేపీ ఎమ్మెల్యే అభ్యర్థిగా అమ్మరాజుల శ్రీదేవికి టిక్కెట్ ఖరారు కావడంతో ఆమె మద్దతుదారులు సంతోషం వ్యక్తం చేశారు.