అమ్మతనం చాటుకున్న కానిస్టేబుల్​

దిశ, తెలంగాణ క్రైం బ్యూరో: పోలీసులంటే కరకుగా ఉంటారు.. వాళ్లకు ఎలాంటి ఎమోషన్స్ ఉండవు అని కొంతమంది ఆరోపిస్తుంటారు. కానీ వాళ్లకు కూడా మంచి మనసు ఉంటుందని అనేక సందర్భాల్లో రుజువైంది. తాజాగా ఓ మహిళా కానిస్టేబుల్​ అమ్మతనాన్ని చాటుకుంది. ఎస్ఐ పరీక్ష రాయడానికి ఓ అభ్యర్థి చంటి బిడ్డతో రాగా పరీక్ష పూర్తయ్యేంత వరకు ఆ మహిళా కానిస్టేబుల్ ఆ చిన్నారిని లాలించి ఆడించింది. ఈ సంఘటన గండిపేట ఎంజీఐటీ కాలేజీ సెంటర్లో జరిగింది.

ఎస్ఐ పోస్టులను భర్తీ చేయటానికి పోలీస్​రిక్రూట్​మెంట్ ​బోర్డు శని, ఆదివారాల్లో పరీక్షలు జరుపుతున్న విషయం తెలిసిందే. ఈ క్రమంలో అఖిల అనే అభ్యర్థి పరీక్ష రాయటానికి ఎంజీఐటీ కాలేజీకి తన రెండు నెలల పసికందును వెంట తీసుకొచ్చింది. దాంతో కానిస్టేబుల్​కన్యాకుమారి ఆ చిన్నారిని పరీక్ష ముగిసే వరకు తన వద్దనే ఉంచుకుంది. లాఠీలు ఝళిపించటమే కాదు అవసరమైతే మానవత్వంతో కూడా స్పందిస్తామని చాటిందా లేడీ కానిస్టేబుల్.