iPhone 17 Ultra: ఐఫోన్ 17 సిరీస్ వచ్చేస్తోంది.. ఎప్పుడంటే?

దిశ, వెబ్ డెస్క్: టెక్ దిగ్గజం యాపిల్ (Apple) సంస్థకు చెందిన ఐఫోన్‌కు (iPhone) యువతలో ఉండే క్రేజే వేరు. ఇప్పటికే ఐఫోన్ 16 సిరీస్ మార్కెట్లోకి రాగా.. తాజాగా ఐఫోన్ 17కు (iPhone 17) సంబంధించిన అదిరే అప్ డేట్ వైరల్ అవుతోంది. ఈ ఏడాది చివరిలో ఐఫోన్ 17 సిరీస్ లాంఛ్ కానున్నట్లు సమాచారం. అలాగే దీనికి సంబంధించిన డిజైన్, ఫీచర్ల గురించి కొన్ని లీక్‌లు బయటకు వచ్చాయి.

ఇక యాపిల్ ప్రో మ్యాక్స్ వేరియంట్ స్థానంలో ఐఫోన్ 17 అల్ట్రా మోడల్‌ను ప్రవేశపెట్టనుందని సమాచారం. అల్ట్రా వేరియంట్ ప్రస్తుత ఐఫోన్ 16 ప్రో మాక్స్‌ను రిప్లేస్ చేయనుందని తెలుస్తోంది. ఇప్పటివరకు యాపిల్ స్మార్ట్‌ఫోన్‌లకు అల్ట్రా లేబుల్‌ను ఉపయోగించలేదు. లీకైన సమాచారం నిజమైతే.. యాపిల్ మొదటి అల్ట్రా ఫోన్‌గా ఐఫోన్ 17 ఎంట్రీ ఇవ్వనుంది. అలాగే, ఈసారి సిరీస్‌లో ప్లస్ మోడల్‌కు బదులుగా ఐఫోన్ 17 ఎయిర్‌ను లాంచ్ చేయవచ్చని తెలుస్తోంది. అలాగే, ఇది స్మాల్ డైనమిక్ ఐలాండ్‌తో వస్తుందని మార్కెట్ నిపుణులు భావిస్తున్నారు. ఆకర్షణీయమైన థర్మల్ మేనేజ్‌మెంట్ కోసం యాపిల్ అల్ట్రా మోడల్‌లో స్టీమ్ చాంబర్ కూలింగ్ సిస్టమ్‌ను అందించనున్నట్లు సమాచారం.

అలాగే, ఐఫోన్ 17లో అనేక AI ఫీచర్లు ఉండనున్నట్లు తెలుస్తోంది. భారీ బ్యాటరీ సామర్థ్యం కలిగి ఉంటుందని, హ్యాండ్‌సెట్ మందమైన బిల్డ్‌ను కలిగి ఉంటుందని భావిస్తున్నారు. అంతేకాదు, సింగిల్ ఛార్జ్‌పై 33 గంటల వీడియో ప్లేబ్యాక్ టైమ్ కూడా అందిస్తుందని చెబుతున్నారు. గత 2 నెలలుగా ఐఫోన్ 17 సిరీస్ గురించి అనేక పుకార్లు వస్తున్నాయి. రాబోయే హై-ఎండ్ ఐఫోన్ మోడల్స్ అల్యూమినియం ఫ్రేమ్ కలిగి ఉండొచ్చు. ఆపిల్ A19 ప్రో చిప్‌పై రన్ అవుతాయి. దీని ప్రారంభ ధర కూడా రూ.90 వేల నుంచి ఉండొచ్చని తెలుస్తోంది. మరీ ఈ విషయాలపై యాపిల్ సంస్థ నుంచి అధికారిక ప్రకటన వచ్చే వరకు వేచి చూడాల్సిందే.