క‌ళ్యాణ మండపంపై సాయికుమార్ కామెంట్స్..

దిశ, సినిమా : ‘రాజావారు రాణిగారు’ ఫేమ్ కిర‌ణ్ అబ్బవ‌రం, ‘టాక్సీవాలా’ ఫేమ్ ప్రియాంక జ‌వాల్కర్ జంట‌గా తెరకెక్కిన సినిమా ‘SR క‌ళ్యాణ మండపం EST 1975’. ఎలైట్ ఎంట‌ర్‌టైన్మెంట్స్ ప‌తాకంపై ప్రమోద్ – రాజు నిర్మిస్తున్న చిత్రం ద్వారా శ్రీధ‌ర్ గాదె దర్శకుడిగా పరిచయం అవుతున్నాడు. మ్యూజిక్ డైరెక్టర్ చేత‌న్ భ‌ర‌ద్వాజ్ అందించిన పాటలు ఇప్పటికే ట్రెండింగ్‌లో ఉండగా.. తాజాగా చిత్ర ట్రైల‌ర్‌ రిలీజ్ చేశారు మేకర్స్. ఈ ట్రైల‌ర్ లాంచ్ ఈవెంట్‌కు హాజరైన సాయి కుమార్ మాట్లాడుతూ.. 50 ఏళ్ల సినీ జీవితంలో ఇప్పటివరకు పోషించిన పాత్రలు తన ఫ‌స్ట్ ఇన్నింగ్స్‌కు వైభ‌వాన్ని తీసుకొస్తే, సెకండ్ ఇన్నింగ్స్‌కు గుర్తింపును తీసుకొచ్చే సినిమా ‘SR క‌ళ్యాణ మండపం’ అన్నారు. ఈ సినిమా ద్వారా హీరో కిరణ్‌కు మంచి పేరు, గుర్తింపు రావాల‌ని కోరుకున్నారు. ఇది కుటుంబ స‌మేతంగా చూడ‌ద‌గ్గ సినిమా అని, ఆగ‌స్ట్ 6న థియేట‌ర్లలో రిలీజ్ కానుందని కిరణ్ వెల్లడించారు. ఈ చిత్రానికి కథ, స్క్రీన్‌ప్లే, డైలాగ్స్ తనే అందించడం విశేషం.

ట్రైలర్ విషయానికొస్తే.. ప్రధానంగా తండ్రీ కొడుకులు సాయికుమార్, కిరణ్ చుట్టే స్టోరీ నడుస్తుందన్న విషయం తెలుస్తోంది. ఫ్రెండ్స్‌తో అల్లరిచిల్లరగా తిరిగే యువకుడు, బాధ్యత లేకుండా వ్యవహరించే తండ్రి, వీరి మధ్యన కామెడీ అండ్ ఎమోషనల్ సీన్లు ట్రైలర్‌ను ఆసక్తికరంగా మలిచాయి. వినోదంతో పాటు అక్కడక్కడా సెంటిమెంట్‌ సీన్లు సినిమాపై ఇంట్రెస్ట్ పెంచడంలో సక్సెస్ అయ్యాయి.