సెమీస్‌కు శ్రీజ

దిశ, స్పోర్ట్స్ : లెబనాన్‌లో జరుగుతున్న వరల్డ్ టేబుల్ టెన్నిస్(డబ్ల్యూటీటీ) ఫీడర్ సిరీస్‌లో తెలుగుమ్మాయి ఆకుల శ్రీజ సెమీస్‌కు దూసుకెళ్లింది. శనివారం జరిగిన ఉమెన్స్ సింగిల్స్ క్వార్టర్ ఫైనల్ మ్యాచ్‌లో శ్రీజ 3-2(11-4, 3-11, 7-11, 11-8, 11-6) తేడాతో చైనీస్ తైపీ క్రీడాకారిణి లియు హ్సింగ్ యిన్‌పై విజయం సాధించింది. ఒక దశలో 1-2తో వెనుకబడిన ఆమె వరుసగా ఆఖరి రెండు గేమ్‌లను నెగ్గి ప్రత్యర్థిని మట్టికరిపించింది. అంతకుముందు మూడో రౌండ్‌లో మరో భారత క్రీడాకారిణి అర్చన‌పై 1-3 తేడాతో శ్రీజ నెగ్గింది. అర్చనతోపాటు దియా పరాగ్, కృత్వికా రాయ్ మూడో రౌండ్‌లో నిష్ర్కమించారు. అలాగే, ఉమెన్స్ డబుల్స్‌లోనూ శ్రీజ సత్తాచాటింది. దియా పరాగ్‌తో కలిసి ఫైనల్‌కు చేరుకుంది. సెమీస్‌లో శ్రీజ జోడీ 3-1(11-6, 12-10, 7-11, 11-8) తేడాతో సర్వినోజ్-జౌరేశ్(కజకస్తాన్)పై గెలుపొందింది.