అలసిపోయా.. కానీ ధైర్యం ఉంది.. ఇన్‌స్టాలో ఆసక్తికర పోస్టు పెట్టిన వినేశ్ ఫొగట్

దిశ, స్పోర్ట్స్ : భారత మాజీ రెజ్లర్ వినేశ్ ఫొగట్ సోమవారం ఇన్‌స్టాగ్రామ్ వేదికగా ఆసక్తికర పోస్టు చేసింది.‘నువ్వు అలిసిపోయావు. నువ్వు గాయపడిన పక్షివి. నిజమే. కానీ, నీలో ఇంకా ధైర్యం అలాగే ఉంది. నీ లక్ష్యం కోసం నువ్వు ఇంకా బతికే ఉన్నావు’ అని రాసుకొచ్చింది. ఆ పోస్టుకు పారిస్ ఒలింపిక్స్‌‌లో పాల్గొన్న ఫొటోను జత చేసింది. పారిస్ ఒలింపిక్స్‌లో 50 కేజీల కేటగిరీలో ఫైనల్‌కు చేరుకున్న వినేశ్‌కు అనూహ్య అనుభవం ఎదురైన విషయం తెలిసిందే. 100 గ్రాముల అదనపు బరువు కారణంగా ఆమెపై అనర్హత వేటు పడింది. దీంతో ఆమెకు కనీసం రజతం కూడా దక్కలేదు. ఆ బాధలో వినేశ్ రెజ్లింగ్‌కు రిటైర్మెంట్ ప్రకటించిన విషయం తెలిసిందే. అయితే, తాజాగా ఇన్‌స్టాలో ఆసక్తికర పోస్టు చేసిన నేపథ్యంలో వినేశ్ రిటైర్మెంట్‌ను వెనక్కి తీసుకుంటుందా? అన్న చర్చ మొదలైంది. కాగా, ఇటీవల హర్యానా అసెంబ్లీ ఎన్నికల్లో కాంగ్రెస్ తరపున పోటీ చేసిన వినేశ్ జులనా స్థానం నుంచి ఎమ్మెల్యేగా గెలుపొందింది.