శభాష్ శ్రీజ.. నేషనల్ టీటీ పోటీలో స్వర్ణంతో మెరిసిన తెలుగు తేజం

దిశ, వెబ్‌డెస్క్: తెలుగు తేజం ఆకుల శ్రీజ జాతీయ టేబుల్‌ టెన్నిస్ పోటీల్లో సంచలన విజయం సాధించింది. ఈ విజయంతో వరుసగా రెండోసారి జాతీయ మహిళల టేబుల్ టెన్నిస్ పోటీల్లో విజేతగా నిలిచింది. జమ్ము వేదికగా జరిగిన జాతీయ సీనియర్‌ టేబుల్‌ టెన్నిస్‌ చాంపియన్‌షిప్‌లో మహిళల సింగిల్స్‌, డబుల్స్‌, టీమ్‌ ఈవెంట్‌ మూడింటిలో స్వర్ణ పతకాలు సాధిచింది. అయితే మిక్స్‌డ్‌ డబుల్స్‌లో కాంస్య పతకంతో సరిపెట్టుకుంది.

నేషనల్ టీటీ పోటీల్లో మహిళల సింగిల్స్‌ విభాగంలో ఫైనల్‌ చేరిన శ్రీజ.. అద్భుతమైన ఆటతీరు కనబరిచింది. ఈ క్రమంలోనే 4-2 (9-11, 14-12, 11-7, 13-11, 6-11, 12-10) పాయింట్లతో పశ్చిమ బెంగాల్‌కు చెందిన మాజీ చాంపియన్‌ సుతిరత ముఖర్జీని ఓడించింది. మహిళల డబుల్స్‌ విభాగంలో శ్రీజ-దియ జోడీ.. వరుసగా 11-7, 11-7, 8-11, 14-12 తేడాతో మహరాష్ట్రకు చెందిన జోడీ స్వస్తికా ఘోష్‌-శ్రుతిపై నెగ్గి స్వర్ణం తమ ఖాతాలో వేసుకుంది. మిక్స్‌డ్‌ డబుల్స్‌లో కూడా శ్రీజ మెరిసింది. శ్రీజ - మనుష్‌ షా జోడీ సెమీఫైనల్‌లో పోరాడి ఓడింది. దీంతో కేవలం కాంస్యంతో సరిపెట్టుకుంది. సెమీస్‌లో శ్రీజ జోడీ 9-11, 10-12, 12-10, 5-11తో మనవ్‌ - అర్చన ద్వయం చేతిలో ఓడింది.