దూకుడుగా ఆడతాం : ఎస్‌ఆర్‌హెచ్ కెప్టెన్ కమిన్స్

దిశ, స్పోర్ట్స్ : ఐపీఎల్-17 సీజన్‌‌ను దూకుడుగా ప్రారంభిస్తామని సన్‌రైజర్స్ హైదరాబాద్(ఎస్‌ఆర్‌హెచ్) కెప్టెన్ ప్యాట్ కమిన్స్ తెలిపాడు. ఈ నెల 23న కోల్‌కతాతో తలపడటం ద్వారా హైదరాబాద్ జట్టు టోర్నీని మొదలుపెట్టనుంది. గురువారం కమిన్స్ ప్రాక్టీస్ చేస్తున్న వీడియోను ఎస్‌ఆర్‌హెచ్ ఎక్స్‌లో పోస్టు చేసింది. ఈ వీడియోలో ఓపెనింగ్ మ్యాచ్ గురించి కమిన్స్ మాట్లాడుతూ..‘కోల్‌కతా బలమైన జట్టు. శుభారంభం చేయాలనుకుంటున్నాం. అందుకోసం ప్రణాళికలతో బరిలోకి దిగుతాం. ఈ సీజన్‌ను దూకుడుగా ఆరంభిస్తాం.’ అని చెప్పాడు.

అలాగే, జట్టు గురించి మాట్లాడుతూ.. ‘సీనియర్లతో, యువకులతో జట్టు బాగుంది. భువనేశ్వర్, ఎయిడెన్ మార్‌క్రమ్ వంటి అనుభవజ్ఞులు ఉన్నారు. అలాగే, అభిషేక్ శర్మ, ఉమ్రాన్ మాలిక్ వంటి ప్రతిభ కలిగిన యువకులు ఉన్నారు. ఈ సీజన్‌లో అభిమానులను ఉత్సాహంగా ఉంచుతాం.’ అని తెలిపాడు. ‘ఇంతకుముందు జట్టు సభ్యులు పెద్దగా తెలియదు. ఇప్పుడు వాళ్లతోనే పనిచేయాల్సి ఉంటుంది. కాబట్టి, వారి గురించి తెలుసుకుంటా. వారికి నా నుంచి ఏం కావాలో తెలుసుకుంటా.’ అని కమిన్స్ చెప్పుకొచ్చాడు.