అదిరిపోనున్న ఐపీఎల్ ప్రారంభ వేడుకలు.. పాన్‌ ఇండియా హీరోయిన్లతో లైవ్‌ పెర్ఫామెన్స్‌
దిశ, వెబ్‌డెస్క్: క్రికెట్ ఫ్యాన్స్‌ ఎంతో ఆసక్తిగా ఎదురుచూస్తున్న ఐపీఎల్-16వ సీజన్ ప్రారంభానికి కౌంట్ డౌన్ ప్రారంభమైంది. ఈ మెగా క్రికెట్ లీగ్‌ మార్చి 31న ప్రారంభమవుతుంది. ప్రారంభ మ్యాచ్‌లో డిఫెండింగ్ ఛాంపియన్ హార్దిక్ పాండ్యా నేతృత్వంలోని గుజరాత్ టైటాన్స్ ఎంఎస్‌ ధోని కెప్టెన్సీలోని చెన్నై సూపర్ కింగ్స్‌తో ఢీ కొడుతుంది. డిసెంబర్‌లో జరిగిన మినీ వేలం ప్రక్రియలో మొత్తం 10 ఫ్రాంచైజీలు తమకు అవసరమైన ఆటగాళ్లను కొనుగోలు చేశాయి.
కరోనా కారణంగా గత సీజన్లలో ప్రారంభ వేడుకలు జరగలేదు. ఈ క్రమంలో సుమారు 4 సంవత్సరాల తర్వాత మన దేశంలో ఐపీఎల్ ప్రారంభ వేడుకలు నిర్వహిస్తున్నారు. ఇందుకోసం భారత క్రికెట్ కంట్రోల్ బోర్డు అన్ని సన్నాహాలు చేస్తోంది. కొవిడ్‌ కారణంగా గత మూడేళ్లుగా ప్రారంభోత్సవ కార్యక్రమాన్ని నిర్వహించలేకపోయారు. మార్చి 31న గుజరాత్-చెన్నై మధ్య మ్యాచ్ ప్రారంభానికి ముందు.. నరేంద్ర మోదీ స్టేడియంలో ప్రారంభ వేడుకలు నిర్వహించనున్నారు.
ఈ సందర్భంగా ప్యాన్‌ ఇండియా హీరోయిన్‌ రష్మిక మందన్న తన డ్యాన్స్‌తో అభిమానులను అలరించనుందని సమాచారం. అలాగే తమన్నా భాటియా కూడా స్టెప్పులు వేయనుందట. ఇక ఫేమస్‌ బాలీవుడ్ సింగర్ అరిజిత్ సింగ్ కూడా తన గొంతును వినిపించనున్నారట.