పాకిస్థాన్‌లోని హిందూవులపై భారత క్రికెటర్ సంచలన పోస్ట్

దిశ, వెబ్‌డెస్క్: రఫాలోని శరణార్థి శిబిరంపై జరిగిన దాడి ప్రపంచ దేశాలను కదిలించింది. ముఖ్యంగా భారత దేశ వ్యాప్తంగా బాలీవుడ్, టాలీవుడ్, కోలీవుడ్ అనే తేడా లేకుండా సెలబ్రెటీలంతా స్పందించారు. సోషల్ మీడియా వేదికగా రఫాకు మద్దతుగా నిలుస్తున్నారు. రఫాపై గత ఆదివారం రాత్రి జరిగిన వైమానిక దాడిలో దాదాపు 45 మంది ప్రాణాలు కోల్పోయారు. వీరంతా యుద్ధంలో నిరాశ్రయులై గాజా నుంచి రఫాకు తరలివచ్చినవారే అని అక్కడి అధికారులు తేల్చారు. అయితే, దేశంలోని సెలబ్రిటీలంతా రఫాకు మద్దతుగా నిలుస్తోన్న వేళ టీమిండియా ప్లేయర్ రాహుల్ తెవాటియా సోషల్ మీడియా వేదికగా సంచలన పోస్ట్ పెట్టారు. పాకిస్థాన్‌లోని హిందువులపై జరుగుతున్న అఘాయిత్యాల అంశాన్ని తెవాటియా లేవనెత్తారు. ‘అందరి ద‌ృష్టి పాకిస్థాన్‌లోని హిందువులపై ఉంది’ అనే క్యాప్షన్‌తో మజీదు ఫొటో పెట్టారు. అంతకుముందు సెలబ్రిటీలంతా ‘అందరి కళ్లు రఫాపైనే’ అని ట్రెండ్ చేశారు. అందుకు కౌంటర్‌గా తెవాటియా ఈ పోస్టు పెట్టారని నెటిజన్లు చర్చించుకుంటున్నారు.