ఈ నెల 19 నుంచి అదనపు టీ20 వరల్డ్ కప్ టికెట్లు

దిశ, స్పోర్ట్స్ : ఈ ఏడాది జరగబోయే టీ20 వరల్డ్ కప్‌కు వెస్టిండీస్, అమెరికా సంయుక్తంగా ఆతిథ్యమిస్తున్న విషయం తెలిసిందే. జూన్ 2 నుంచి టోర్నీ ప్రారంభకానుంది. పొట్టి ప్రపంచకప్‌లో మొత్తం 55 మ్యాచ్‌లు జరగనున్నాయి. ఇప్పటికే 37 మ్యాచ్‌ల టికెట్లను రిలీజ్ చేసిన ఐసీసీ తాజాగా మరిన్ని మ్యాచ్‌ల టికెట్లను అందుబాటులోకి తీసుకరానుంది. ఈ నెల 19 నుంచి 13 మ్యాచ్‌ల టికెట్లను రిలీజ్ చేయనున్నట్టు ఐసీసీ గురువారం వెల్లడించింది. దీంతో మొత్తం 51 మ్యాచ్‌ల టికెట్లు అందుబాటులోకి రానున్నాయి. ప్రస్తుతం 37 మ్యాచ్‌ల టికెట్లు మాత్రమే కొనుగోలుకు అవకాశం ఉండగా.. ఈ నెల 19 నుంచి 13 మ్యాచ్‌ల టికెట్లను అందుబాటులోకి వస్తాయి. ఈ 13 మ్యాచ్‌ల్లో సెమీస్‌లు కూడా ఉన్నాయి. అలాగే, జూన్ 5న ఐర్లాండ్‌తో, జూన్ 12న అమెరికాతో టీమ్ ఇండియా తలపడాల్సి ఉండగా.. ఈ మ్యాచ్‌లకు సంబంధించిన టికెట్లు అందుబాటులోకి రానున్నాయి. వెస్టిండీస్‌లో జరిగే మ్యాచ్‌లకు రూ. 500, అమెరికాలో జరిగే మ్యాచ్‌లకు రూ. 2900లతో టికెట్ ధరలు ప్రారంభమవుతాయి. టీ20 వరల్డ్ కప్ అధికారిక వెబ్‌సైట్‌లో టికెట్లు అందుబాటులో ఉన్నాయి.