ఐసీసీ టెస్ట్ క్రికెటర్ ఆఫ్ ది ఇయర్ 2022: ఇంగ్లాండ్ స్టార్ ప్లేయర్

దిశ, వెబ్‌డెస్క్: ఇంగ్లాండ్ కెప్టెన్, స్టార్ ఆల్ రౌండర్ బెన్‌స్టోక్స్‌కు అరుదైన గౌరవం దక్కింది. ఐసీసీ టెస్ట్ క్రికెటర్ ఆఫ్ ది ఇయర్ 2022 అవార్డుకు ఎంపికయ్యాడు. జో రూట్ రిటైర్మెంట్ తర్వాత కెప్టెన్సీ పగ్గాలు చేపట్టిన స్టోక్స్.. టెస్టు ఫార్మట్‌లో తిరుగులేని పాత్ర పోషించాడు. ఇక, గతేడాది 2022 లో ఆల్ రౌండర్ ప్రదర్శనతో ఆకట్టుకున్న ఈ ప్లేయర్ ఖాతాలో ఐసీసీ ప్రతిష్టాత్మక అవార్డు పడింది. తన ప్రదర్శనకు టెస్టు క్రికెటర్ ఆఫ్ ది ఇయర్ 2022 అవార్డుకు ఎంపికైనట్లు ఇంటర్నేషనల్ క్రికెట్ కౌన్సిల్ గురువారం ప్రకటించింది. అతను ఇంగ్లాండ్ తరుపున 10 టెస్టు మ్యాచ్‌లు సారథ్యం వహించగా అందులో 9 మ్యాచ్‌లు గెలవడంతో పాటు.. న్యూజిలాండ్, భారత్, దక్షిణాఫ్రికా, పాకిస్థాన్‌లపై ఇంగ్లండ్‌కు విజయాన్ని అందించడంలో కీలక పాత్ర పోషించాడు. అంతేకాక 2022 ఇయర్ కాలెండర్‌లో రెండు సెంచరీలు, ఐదు అర్ధ సెంచరీలతో 870 పరుగులు చేయగా.. టెస్టుల్లో అత్యధిక పరుగులు చేసిన జాబితాలో ఏడో స్థానంలో నిలిచాడు. అంతేకాక 26 వికెట్లను తన ఖాతాలో వేసుకున్నాడు.