డేవిస్ కప్‌ గ్రూపు-1 టైలో భారత్‌కు కఠిన డ్రా

దిశ, స్పోర్ట్స్ : ప్రతిష్టాత్మక డేవిస్ కప్‌లో భారత్ గ్రూపు-1 టైకి అర్హత సాధించిన విషయం తెలిసిందే. ఇటీవల గ్రూపు-1 ప్లే ఆఫ్స్ మ్యాచ్‌లో పాకిస్తాన్‌ను వారి సొంతగడ్డపై 4-0తో భారత్ చిత్తుగా ఓడించింది. ఈ విజయంతో భారత్ గ్రూపు-1 టైకి క్వాలిఫై అవ్వగా.. గురువారం నిర్వాహకులు డ్రా రిలీజ్ చేశారు. డ్రాలో భారత్‌కు కఠిన ప్రత్యర్థి ఎదురైంది. సెప్టెంబర్‌లో జరగబోయే ఈ మ్యాచ్‌లో స్వీడన్‌తో భారత జట్టు తలపడనుంది. డేవిస్ కప్‌లో స్వీడన్‌పై భారత్ గెలిచిన దాఖలాలు లేవు. ఇప్పటివరకు ఐదుసార్లు తలపడగా అన్నింటి పరాజయమే ఎదురైంది. చివరిసారిగా ఢిల్లీ వేదికగా జరిగిన మ్యాచ్‌లో 3-1తో ఓడిపోయింది. డ్రాపై భారత కెప్టెన్ రోహిత్ రాజ్‌పాల్ స్పందిస్తూ..‘ఇది కష్టమైన డ్రానే. హోం టీమ్ ఎంచుకున్న ఉపరితలంపై ఆధారపడి ఉంటుంది. అయితే, మేము కూడా బలమైన జట్టును ఎంపిక చేస్తాం. ఈ డ్రాను మేము పూర్తిగా ఉపయోగించుకోవాలనుకుంటున్నాం.’ అని తెలిపాడు.