చెన్నయ్ ఓపెన్ టోర్నీలో సెమీస్‌కు సుమిత్

దిశ, స్పోర్ట్స్ : భారత స్టార్ టెన్నిస్ ఆటగాడు సుమిత్ నాగల్ చెన్నయ్ ఓపెన్ టోర్నీలో సెమీస్‌కు దూసుకెళ్లాడు. శుక్రవారం జరిగిన మెన్స్ సింగిల్స్ క్వార్టర్ ఫైనల్ మ్యాచ్‌లో సుమిత్ 6-3, 6-3 తేడాతో చెక్ రిపబ్లిక్ ప్లేయర్ డిమినిక్ పాలన్‌ను చిత్తు చేశాడు. స్పష్టమైన ఆధిపత్యం ప్రదర్శించిన సుమిత్ కేవలం గంటా 31 నిమిషాల్లోనే వరుస సెట్లను గెలుచుకున్నాడు. మూడు సార్లు ప్రత్యర్థి సర్వీస్‌లను బ్రేక్ చేశాడు. ఆరు డబుల్ ఫౌల్ట్స్‌తో చెక్ రిపబ్లిక్ ఆటగాడు మూల్యం చెల్లించుకున్నాడు. మరో భారత ఆటగాడు ముకుంద్ శశికుమార్ పోరాటం క్వార్టర్స్‌లో ముగిసింది. చెక్ రిపబ్లిక్‌కే చెందిన దాలిబోర్ స్వర్చినా‌ చేతిలో 6-7, 6-2, 6-4 తేడాతో పరాజయం పాలయ్యాడు. తొలి సెట్‌లో చక్కటి పోరాట పటిమ కనబర్చిన శశికుమార్ ఆ సెట్‌ను టై బ్రేకర్‌లో గెలుచుకున్నాడు. రెండో సెట్‌లో ప్రత్యర్థి పుంజుకోవడం, శశికుమార్ అనవసర తప్పిదాలతో ఆ సెట్‌ను కోల్పోయాడు. ఇక, నిర్ణయాత్మక మూడో సెట్‌లో కష్టపడినా ప్రత్యర్థి దూకుడు నిలువరించలేక మ్యాచ్‌ను సమర్పించుకున్నాడు. సెమీస్‌లో దాలిబోర్ స్వర్చినా‌తో సుమిత్ తలపడనున్నాడు.