కరోనా ఫ్రీ కంట్రీగా స్లోవేనియా!

తమ దేశం నుంచి కరోనా మహమ్మారి పూర్తిగా తొలగిపోయిందని స్లోవేనియా అధికారికంగా ప్రకటించింది. అంతేకాకుండా ఈ ప్రకటన చేసిన మొదటి యురోపియన్ దేశంగా స్లోవేనియా నిలిచింది. గత రెండు వారాల్లో కొత్తగా ఏడు కేసులు మాత్రమే నమోదైన కారణంగా తాము ఈ నిర్ణయం తీసుకున్నట్లు అధికారులు తెలిపారు. అయితే ఇతర యురోపియన్ యూనియన్ దేశాల నుంచి వస్తున్న వారు మాత్రం కచ్చితంగా ఏడు రోజుల పాటు క్వారంటైన్ పాటించాలని సూచించింది.

20 లక్షల జనాభా ఉన్న ఈ దేశానికి ఇటలీ, ఆస్ట్రియా, హంగేరీ, క్రొయేషియా దేశాలు సరిహద్దుగా ఉన్నాయి. ఇప్పటివరకు ఈ దేశంలో 1464 కేసులు నమోదుకాగా, 103 మంది చనిపోయారు. మార్చి 12వ తేదీన ఈ దేశం కరోనాను మహమ్మారిగా గుర్తించింది. గత రెండు నెలలుగా స్లోవేనియా కరోనాతో పోరాడి విజయం సాధించి మిగతా యూరప్ దేశాలకు ఆదర్శంగా నిలిచిందని ఆ దేశ ప్రధాని జానెజ్ జాన్సా ప్రకటించారు. విదేశాల నుంచి కరోనా లక్షణాలతో వచ్చేవారిని తమ దేశానికి రానివ్వబోమని తెగేసి చెప్పేశారు. ప్రజలు కొద్దిగా క్రమశిక్షణ పాటించాలని.. మాస్కులు, సామాజిక దూరం మెయింటెయిన్ చేయాలని చెప్పారు. ఇప్పటికే ప్రజారవాణాకు అనుమతించిన స్లోవేనియా.. ఈ వారాంతంలోగా హోటళ్లు, బార్లు, పాఠశాలలను కూడా తెరిచేందుకు సిద్ధమైంది.