ఈటలను కలిసిన సర్దార్‌ రవీందర్ సింగ్.. హుజురాబాద్‌ రిపీట్ కావాలంటూ..!

దిశ, హుజురాబాద్: స్థానిక సంస్థల ఎమ్మెల్సీ ఎన్నికల్లో స్వతంత్ర అభ్యర్థిగా పోటీ చేస్తున్న సర్దార్ రవీందర్ సింగ్ ఎమ్మెల్యే ఈటల రాజేందర్, మాజీ ఎమ్మెల్యే బొడిగె శోభల మద్దతు కావాలని కోరారు. గురువారం హుజురాబాద్ నియోజకవర్గంలోని ధర్మరాజ్‌పల్లిలో ఈటలకు శాలువా కప్పి సర్దార్‌ సన్మానించారు. బీజేపీ కార్యాలయంలో మాజీ ఎమ్మెల్యే NVSS ప్రభాకర్, బీజేపీ జిల్లా అధ్యక్షుడు గంగాడి కృష్ణారెడ్డి తదితర బీజేపీ నాయకులను కలిసి ఎమ్మెల్సీ ఎన్నికల్లో గెలిపించాల్సిందిగా సర్దార్ అభ్యర్థించారు.

తెలంగాణ రాష్ట్ర సాధన కోసం కృషి చేసిన ఉద్యమ కారులకు సీఎం కేసీఆర్ తగిన గుర్తింపు ఇవ్వడం లేదని ఆవేదన వ్యక్తం చేశారు. ఉద్యమ ద్రోహులకు పెద్ద పీఠ వేస్తున్న కేసీఆర్‌కు తగిన గుణపాఠం చెప్పేందుకు తనకు మద్దతు తెలపాలన్నారు. ప్రలోభాలకు తలొగ్గకుండా హుజురాబాద్ ఫలితాలను ఎమ్మెల్సీ ఎన్నికల్లో పునరావృతం చేయాలని రవీందర్ సింగ్ కోరారు. కాగా, ఈటల, శోభ, ప్రభాకర్, బీజేపీ శ్రేణులు పరోక్షంగా సుముఖత వ్యక్తం చేశారు. ఈ కార్యక్రమంలో కరీంనగర్ మాజీ మేయర్ డి. శంకర్, మాజీ ఎంపీపీ వీర్ల నర్సింగ రావు తదితరులు పాల్గొన్నారు.