యాచకురాలి ఇంట్లో చోరీ…

దిశ, చార్మినార్ : యాచకురాలి ఇంట్లో దొంగతనం చేసి తప్పించుకు తిరుగుతున్న ఓ వ్యక్తిని ఫలకనుమా పోలీసులు అదుపులోకి తీసుకుని రిమాండ్ కు తరలించారు. అతని వద్ద నుంచి 1.71 లక్షలు నగదు, గోల్డ్ చైన్, కమ్మలు, గోల్డ్ రింగ్ తో పాటు వెండి ని ఫలక్‌నుమా పోలీసులు స్వాధీనం చేసుకున్నారు. పోలీసులు తెలిపిన వివరాల ప్రకారం .. ఫలక్‌నుమా కు చెందిన మహ్మద్ ఖాదర్, హజేరా బేగం లు భార్య భర్తలు. వీరికి ఇద్దరు సంతానం. హజేరా బేగం భిక్షాటం చేస్తూ కుటుంబాన్ని పోషించుకునేది. భిక్షాటనం చేయగా వచ్చిన 1.70 లక్షల నగదు, బంగారు, వెండి ఆభరణాలను కూడబెట్టుకుంది.

ఈ నెల 23న గాంధీనగర్‌లోని తన చెల్లెలు ఇంటికి వెళ్లేముందు ఓ డ్రమ్ లో నగదు, వెండి, బంగారు ఆభరణాలు దాచిపెట్టింది. తన చెల్లెలు ఇంటికి వెళ్లి మరునాడు వచ్చి చూసే సరికి డ్రమ్ లో దాచిన నగదు,అభరణాలు చోరీకి గురవడంతో వెంటనే ఫలక్‌నుమా పోలీసులకు హజేరా బేగం ఫిర్యాదు చేసింది. కేసు నమోదు చేసుకున్న పోలీసులు విశ్వసనీయ సమాచారం మేరకు హజేరా బేగం ఇంట్లో చోరీకి పాల్పడి తప్పించుకు తిరుగుతున్న మైలార్‌దేవ్‌పల్లికి చెందిన మహ్మద్ జావిద్‌పటేల్ ను అదుపులోకి తీసుకుని రిమాండ్ కు తరలించారు. అతని వద్ద నుంచి దొంగిలించిన సొత్తును పోలీసులు స్వాధీనం చేసుకుని కేసును దర్యాప్తు చేస్తున్నారు.