జక్కన్నను మెప్పించిన అలియా …

దర్శక ధీరుడు రాజమౌళి బాలీవుడ్ హీరోయిన్ అలియా భట్ పై ప్రశంసల వర్షం కురిపించారు. తాజాగా ఓ ఇంటర్వ్యూలో RRR సినిమా గురించి మాట్లాడిన ఆయన… అలియా భట్ ను ఎందుకు ఎంపిక చేసుకున్నారు అనే ప్రశ్నకు సమాధానమిచ్చారు. రామ్ చరణ్ అల్లూరి సీతారామరాజుగా, తారక్ కొమురం భీంగా నటిస్తుండగా… తారక్, చెర్రీ లకు ధీటుగా నటించే ఓ హీరోయిన్ కావాలి అనుకున్నామని తెలిపారు. అమాయకంగా కనిపిస్తూనే తెగువ చూపే పాత్రకు ఎవరూ సరిపోతారని ఆలోచించగా… ఈ పాత్రకు అలియా 100 శాతం న్యాయం చేస్తుందని అనిపించిందన్నారు. అందుకే ఆమెను ఎంచుకున్నట్లు చెప్పారు జక్కన్న.

మామూలుగా ఐతే ఇప్పటికే అలియా చిత్రీకరణ జరగాల్సి ఉందన్నారు. మే నెల మొదటి వారంలో కొన్ని సన్నివేశాలు చేద్దామనే అనుకున్నామని… కానీ లాక్ డౌన్ కారణంగా షూటింగ్ వాయిదా పడిందని తెలిపారు. దీంతో రీ షెడ్యూల్ తప్పలేదన్నారు జక్కన్న.

ఇదిలా ఉంటే RRR కోసం భారీ రెమ్యునరేషన్ తీసుకుంటుందట అలియా భట్. పది రోజులు కాల్షీట్లు సర్దుబాటు చేసిన భామ… రోజుకు రూ. 50 లక్షలు తీసుకుంటుందని టాక్. అంటే రూ. 5 కోట్లు అన్న మాట.ఈ విషయంలో ఇన్ని రోజులు కామెంట్స్ వినిపించినా… రాజమౌళి అంచనాలు అందుకున్న అలియా ఆ మాత్రం డిమాండ్ చేయడంలో తప్పు లేదంటున్నారు అభిమానులు.

Tags: RRR, SSRajamouli, Alia Bhatt, NTR, Ram Charan Tej