వాషింగ్ పౌడర్ నిర్మా.. అంటూ అమిత్ షాకు బీఆర్ఎస్ స్వాగతం!'

దిశ, వెబ్ డెస్క్: హైదరాబాద్ లో హోర్డింగులు, ఫ్లెక్సీల కలకలం అలజడి స‌ృష్టిస్తోంది. తాజాగా వాషింగ్ పౌడర్ నిర్మా.. అంటూ అమిత్ షాకు స్వాగతం అంటూ బీఆర్ఎస్ కార్యకర్తలు భారీ హోర్డింగ్ ను ఏర్పాటు చేశారు. ఈ  నేపథ్యంలో బీఆర్ఎస్, బీజేపీ మధ్య ఉద్రిక్త పరిస్థితులు నెలకొన్నాయి. ఇంతకు ఏం జరిగిందంటే.. కేంద్ర హోం మంత్రి అమిత్ షా శనివారం రాత్రి హైదరాబాద్ కు వచ్చారు. 54వ సీఐఎస్ఎఫ్ రైజింగ్ డే పరేడ్ లో పాల్గొనేందుకు ఆయన నగరానికి వచ్చారు. అయితే ఆదివారం బీఆర్ఎస్ పార్టీకి చెందిన కొందరు కార్యకర్తలు ‘‘ వెల్ కం అమిత్ షా ’ అంటూ జేబీఎస్ జంక్షన్ వద్ద పెద్ద హోర్డింగ్ ను ఏర్పాటు చేశారు.  నిర్మా యాడ్ లోని యువతి ఫోటోకు పలువురు బీజేపీ నేతల ముఖాలను తగిలిస్తూ.. అమిత్ షాకు స్వాగతం అంటూ బీఆర్ఎస్ నేతలు ఈ హోర్డింగ్ ను ఏర్పాటు చేశారు.

నిర్మా యాడ్ లోని యువతి ముఖానికి మార్ఫింగ్ చేసి బీజేపీ నేతలు హిమంత బిశ్వ శర్మ, నారాయణ్ రాణే, సువేంద్ అధికారి, సుజనా చౌదరి, అర్జున్ ఖోట్కర్, జ్యోతిరాధిత్య సింధియా, ఈశ్వరప్ప, విరూపాక్షప్ప ముఖాలను తగిలించారు. ఎంతటి అవినీతి పరులైనా బీజేపీలో చేరగానే పునీతులు అవుతారు అనే అర్థం వచ్చేలా బీఆర్ఎస్ శ్రేణులు ఏర్పాటు చేసిన ఈ హోర్డింగ్ రాజకీయంగా ప్రకంపనలు సృష్టిస్తోంది. సీఎం కేసీఆర్ కూతురు ఎమ్మెల్సీ కవిత శనివారం ఈడీ విచారణకు హాజరైన నేపథ్యంలో ఈ హోర్డింగ్ చర్చనీయాంశంగా మారింది. కాగా గతంలో కూడా పీఎం హైదరాబాద్ పర్యటనకు వచ్చినప్పుడు ఆయనను విమర్శిస్తూ కొంత మంది ఫ్లెక్సీలు ఏర్పాటు చేసిన విషయం తెలిసిందే. ఇక ఈ హోర్డింగ్, పోస్టర్లపై బీజేపీ మండిపడుతోంది.