Viral Video: సెల్ ఫోన్ కోసం పట్టువిడువని బాలిక.. రోడ్డుపై ఈడ్చుకెళ్లిన ఫోన్ దొంగలు

దిశ, డైనమిక్ బ్యూరో: పంజాబ్‌లోని జలంధర్‌లో ఫోన్ దొంగలు బీభత్సం సృష్టించారు. సెల్ ఫోన్ కోసం ఓ బాలికను రోడ్డు మీద ఈడ్చుకొని వెళ్లారు. దీనికి సంబంధించిన భయానక వీడియో సోషల్ మీడియాలో వైరల్ గా మారింది. ఈ వీడియో ప్రకారం 12 వ తరగతి చదువుతున్న లక్ష్మి అనే బాలిక రోడ్డు పక్కన నిలుచుంది. ఇంతలో బైక్ పై వచ్చిన సెల్ ఫోన్ దొంగలు ఆమె చేతిలో ఉన్న ఫోన్ చోరీ చేసే ప్రయత్నం చేశారు. ఫోన్ గుంజుకొని వెళుతుండగా.. బాలిక నిందితులలో ఒకరి చేతిని పట్టుకుంది. వారు విదిలించుకునే ప్రయత్నం చేసిన బాలిక పట్టువిడవకుండా బలంగా పట్టుకుంది. దీంతో నిందితులు ఆమెను బైక్ పై చాలా దూరం ఈడ్చుకొని వెళ్లారు. దీంతో బాలిక బట్టలు కూడా చాలావరకు చిరిగిపోయాయి. చివరికి దొంగలు ఆమెను విదిలించుకొని ఫోన్ తో పరారయ్యారు. ఈ ఘటన అక్కడి సీసీ కెమెరాలో రికార్డు అయ్యింది. దీంతో ప్రస్తుతం ఈ భయానక వీడియో నెట్టింట దుమారం రేపుతోంది. ఈ వీడియో చూసిన నెటిజన్లు పట్టువిడువని బాలిక ధైర్యాన్ని మెచ్చుకుంటున్నారు. అంతేగాక నిందితులను గుర్తించి ఆ బాలిక సెల్ ఫోన్ రికవరీ చేసి ఇవ్వాలని జలంధర్ పోలీసులను కోరుతున్నారు.