RSS: సీతారాం ఏచూరి, రతన్ టాటాలకు నివాళులర్పించిన ఆర్ఎస్ఎస్

దిశ, నేషనల్ బ్యూరో: రాష్ట్రీయ స్వయంసేవక్ సంఘ్ (ఆర్ఎస్ఎస్) వార్షిక సమావేశంలో, ఇటీవల మరణించిన సీపీఐ(ఎం) మాజీ ప్రధాన కార్యదర్శి సీతారాం ఏచూరికి జాతీయ కౌన్సిల్ నివాళులు అర్పించింది. మథురలోని గౌ గ్రామ్‌లోని దీనదయాళ్ గౌ విజ్ఞాన్ రీసెర్చ్ అండ్ ట్రైనింగ్ సెంటర్‌లోని నవధా ఆడిటోరియంలో శుక్రవారం సంఘ్ వార్షిక ఎగ్జిక్యూటివ్ బోర్డ్ రెండు రోజుల సమావేశాన్ని సర్సంఘచాలక్ మోహన్ భగవత్, దత్తాత్రేయ హోసబాలే ప్రారంభించారు. ఈ సమావేశంలో ఏచూరితో పాటు జైపూర్‌కు చెందిన రాఘవాచార్య మహరాజ్, పారిశ్రామికవేత్త, పద్మవిభూషణ్ రతన్ టాటా, పశ్చిమ బెంగాల్ మాజీ ముఖ్యమంత్రి బుధదేవ్ భట్టాచార్య, ఈనాడు, రామోజీ ఫిల్మ్ సిటీ వ్యవస్థాపకుడు రామోజీరావు, మాజీ విదేశాంగ మంత్రి కె. నట్వర్ సింగ్‌లకు ఆర్‌ఎస్‌ఎస్ నివాళులర్పించింది. భగవత్‌ విజయదశమి ప్రసంగంలో లేవనెత్తిన అంశాలపై చర్చిస్తామని ఆర్ఎస్ఎస్ ఓ ప్రకటనలో తెలిపింది. భగవత్ తన వార్షిక ప్రసంగంలో హిందువుల మధ్య ఐక్యత కోసం పిలుపునిచ్చారు. రెండు రోజుల సమావేశం ప్రాథమిక ఎజెండా 'పంచ పరివర్తన్' లేదా సామాజిక సామరస్యం, కుటుంబ విలువలు, పర్యావరణం, స్వీయ-క్రమశిక్షణతో కూడిన జీవనశైలి, పౌర విధులతో సహా ఐదు మార్పుల చుట్టూ తిరుగుతుంది. ఈ సందేశాలను సమాజానికి విస్తృతంగా తీసుకెళ్లే మార్గాలను సమావేశంలో చర్చించనున్నట్లు ప్రకటన పేర్కొంది.