హెచ్‌సీఏ టీ20 టోర్నీ విజేత మెద‌క్‌

దిశ ,తెలంగాణ బ్యూరో : హైద‌రాబాద్ క్రికెట్ అసోసియేష‌న్ (హెచ్‌సీఏ) నిర్వ‌హించిన‌ అంత‌ర్ జిల్లాల టీ20 క్రికెట్ టోర్న‌మెంట్ ట్రోఫీని మెద‌క్ జిల్లా జ‌ట్టు కైవ‌సం చేసుకోగా, క‌రీంన‌గ‌ర్ టీం ర‌న్న‌ర‌ప్‌గా నిలిచింది. బుధ‌వారం ఉప్ప‌ల్ స్టేడియం వేదిక‌గా జ‌రిగిన ఫైన‌ల్ మ్యాచులో టాస్ గెలిచి తొలుత బ్యాటింగ్‌కు దిగిన మెద‌క్ 20 ఓవ‌ర్ల‌లో 168/4 స్కోరు చేసింది. ల‌క్ష్య ఛేద‌న‌లో క‌రీంన‌గ‌ర్ 20 ఓవ‌ర్ల‌లో 145/6 స్కోరు మాత్రమే చేయగా మెద‌క్ టీం 23 ప‌రుగుల తేడాతో విక్టరీ కొట్టింది. మెదక్‌ టీంలో బ్యాట‌ర్ మహ్మాద్ అఫ్రీది 40 బంతుల్లో 7 సిక్స్‌లు, 2 ఫోర్ల సాయంతో 80 ప‌రుగులు చేసి జట్టు విజయంలో కీలక పాత్ర పోషించాడు.

అఫ్రీదికి రూ.50 వేల క్యాష్ రివార్డు..

టోర్నీ అనంతరం హెచ్‌సీఏ ప్రెసిడెంట్ జగన్ మోహన్ రావు మెదక్ జట్టు విజయంలో కీ రోల్ పోషించిన అఫ్రీదికి రూ.50వేల నగదు బహుమతి అందజేశారు. ఈ సందర్భంగా ఆయన మాట్లాడుతూ.. ఈ ఏడు లాగానే ప్ర‌తి ఏటా రాష్ట్రంలో స‌మ్మ‌ర్ క్యాంప్ నిర్వ‌హించి, ఆ వెంట‌నే అంత‌ర్ జిల్లాల టీ20 టోర్నీని నిర్వ‌హిస్తామ‌న్నారు. అపెక్స్ కౌన్సిల్‌లో చ‌ర్చించి ఈ టోర్నీకి త్వ‌ర‌లోనే ఒక దిగ్గ‌జ క్రికెట‌ర్ పేరు పెడ‌తామ‌న్నారు. హైద‌రాబాద్‌లో శాటిలైట్ అకాడమీల ఏర్పాటుతో పాటు జిల్లాల నుంచి వ‌చ్చే క్రికెట‌ర్ల‌కు ఇక్క‌డ శిక్ష‌ణ‌, వ‌స‌తి స‌దుపాయం క‌ల్పించే విష‌య‌మై కూడా అపెక్స్‌ కమిటీలో చ‌ర్చించి నిర్ణ‌యం తీసుకుంటామ‌ని చెప్పారు. కార్య‌క్ర‌మంలో హెచ్‌సీఏ ఉపాధ్య‌క్షుడు ద‌ల్జిత్ సింగ్‌, స‌హాయ కార్య‌ద‌ర్శి బ‌స‌వ‌రాజు, కోశాధికారి సీజే శ్రీనివాస్‌,సీఈఓ సునీల్,క‌రీంన‌గ‌ర్ జిల్లా క్రికెట్ సంఘం కార్య‌ద‌ర్శి ఆగంరావు, మెద‌క్ జిల్లా క్రిక‌ట్ సంఘం కార్య‌ద‌ర్శి రాజేంద‌ర్ రెడ్డి హాజ‌ర‌య్యారు.