మోడీ ప్రమాణస్వీకారానికి కాంగ్రెస్ అగ్రనేత హాజరు!

దిశ, వెబ్‌డెస్క్: ఇటీవల జరిగిన పార్లమెంట్ ఎన్నికల్లో ఎన్డీఏ కూటమి ఘన విజయం సాధించిన విషయం తెలిసిందే. 293 సీట్లతో వరుసగా మూడోసారి ప్రభుత్వాన్ని ఏర్పాటు చేయబోతోంది. ప్రధానిగా మోడీ సైతం మూడోసారి బాధ్యతలు చేపట్టబోతున్నారు. ఇవాళ ఢిల్లీలోని రాష్ట్రపతి భవన్ వేదికగా సాయంత్రం 7:15 గంటలకు ఈ మహా ఘట్టం ప్రారంభం కానుంది. ప్రధాని మోడీతో పాటు మరో 50 మంది ఎంపీలు కేంద్రమంత్రులుగా ప్రమాణం చేయనున్నారు. తెలుగు రాష్ట్రాల నుంచి మొత్తంగా ఐదుగురు ప్రమాణస్వీకారం చేయబోతున్నారు. ఇదిలా ఉండగా మోడీ ప్రమాణస్వీకారానికి ఇతర దేశాల నుంచి అనేక మంది ప్రముఖులు హాజరు కాబోతున్నారు. ఈ క్రమంలో కాంగ్రెస్ పార్టీ తరపున ఎవరు హాజరుకాబోతున్నారు? అనే చర్చ మొదలైంది. తాజాగా హాజరుపై కాంగ్రెస్ అధిష్టానం క్లారిటీ ఇచ్చినట్లు తెలుస్తోంది. మోడీ ప్రమాణస్వీకారానికి ఏఐసీసీ అధ్యక్షులు మ‌ల్లికార్జున్ ఖ‌ర్గే హాజ‌రు కానున్నట్లు సమాచారం. ఇప్పటికే మోడీ ప్రమాణ స్వీకార కార్యక్రమానికి రావాల‌ని ఆయ‌న‌కు ఆహ్వాన ప‌త్రం అందింద‌ని స‌మాచారం. విప‌క్ష ఇండియా కూట‌మి భాగ‌స్వామ్య పార్టీల‌తో చ‌ర్చించిన మీద‌ట హాజరు కావాలని ఖ‌ర్గే నిర్ణయం తీసుకున్నట్టు తెలిసింది.