Uttar Pradesh: ఉత్తరప్రదేశ్ లో ఘోర ప్రమాదం.. ఏడుగురు మృతి

దిశ, నేషనల్ బ్యూరో: ఉత్తరప్రదేశ్‌లోని(Uttar Pradesh) బిజ్నోర్‌లో(Bijnor) ఘోర రోడ్డు ప్రమాదం చోటుచేసుకుంది. శనివారం తెల్లవారుజామున ధాంపూర్‌లోని(Dhampur) 74వ జాతీయ రహదారిపై క్రెటా కారు ఆటో ఢీకొని ఏడుగురు చనిపోయారు. ఈ ప్రమాదంలో నవదంపతులు సహా ఒకే కుటుంబానికి చెందిన ఆరుగురు చనిపోయారు. తీవ్ర గాయాలైన ఆటో డ్రైవర్ చికిత్స పొందుతూ చనిపోయాడు. కాగా.. ధాంపూర్‌లోని తిబ్డి గ్రామంలో నివాసముంటున్న మగ పెళ్లివారి కుటుంబం జార్ఖండ్‌కు చెందిన వధువుతో కలిసి తమ ఇంటికి తిరిగి వస్తుండగా ఈ విషాదం చోటుచేసుకుంది. వధువుకు స్వాగతం పలికేందుకు వరుని ఇంట్లో ఏర్పాట్లు జరుగుతున్నాయి. నవదంపతులు వస్తారని ఎదురు చూసిన వారికి డెడ్ బాడీలు కన్పించడంతో కుటుంబసభ్యులు కన్నీరు మున్నీరయ్యారు.

ముఖ్యమంత్రి సంతాపం

మృతుల్లో ఇద్దరు మహిళలు, ఒక బాలిక ఉన్నట్లు పోలీసులు తెలిపారు. వివాహానికి హాజరైన తర్వాత కుటుంబం మొత్తం తిరిగి ఇంటికి వస్తున్న సమయంలో ఘటన జరిగినట్లు తెలిపారు. ఉత్తరప్రదేశ్ ముఖ్యమంత్రి యోగి ఆదిత్యనాథ్ ప్రమాద మృతులకు సంతాపం తెలిపారు. తక్షణమే సహాయక చర్యలు చేపట్టాలని ఆదేశించారు. కాగా.. ఈ ఘటనపై కేసు నమోదు చేసిన పోలీసులు విచారణ చేపట్టారు.